കേരളത്തിലെ നിഗൂഢമായ നരകപ്പാലം, അവിടെ വളരുന്ന നീലക്കൊടുവേലി; എത്ര കണ്ടാലും മതിവരാത്ത ഇല്ലിക്കല്‍ കല്ല്
കോട്ടയം ജില്ലയിലെ പ്രശസ്തമായ വിനോദ സഞ്ചാര കേന്ദ്രങ്ങളിലൊന്നാണ് ഇല്ലിക്കല്‍ കല്ല്. സമുദ്രനിരപ്പില്‍ നിന്ന് ഏകദേശം 6,000 അടി ഉയരത്തില്‍ സ്ഥിതി ചെയ്യുന്ന ഇല്ലിക്കല്‍ മലയിലാണ് ഇല്ലിക്കല്‍ കല്ലുള്ളത്.മൂന്ന് ഭീമൻ പാറക്കെട്ടുകള്‍ ഒരുമിച്ച്‌ ചേ‍ർന്നാണ് ഇല്ലിക്കല്‍ കല്ലുണ്ടായത്. ഇവ ഓരോന്നിനും പ്രത്യേക ആകൃതിയുണ്ട്. അവയിലൊന്നിന് കൂണിനോട് സാമ്യമുള്ളതിനാല്‍ കുടക്കല്ല് (കുടയുടെ ആകൃതിയിലുള്ള പാറ) എന്നാണ് അറിയപ്പെടുന്നത്. രണ്ടാമത്തെ പാറക്കെട്ടിന് വശങ്ങളില്‍ ഒരു ചെറിയ കൂനയുണ്ട്, അതിനാല്‍ ഇതിനെ കൂനുകല്ല് എന്ന് വിളിക്കുന്നു. മൂന്നാമത്തെ കല്ലാണ് ഇല്ലിക്കല്‍ കല്ല്. ഇല്ലിക്കല്‍ മലയില്‍ നിരവധി അരുവികള്‍ ഉണ്ട്. അവ താഴേക്ക് ഒഴുകി ശാന്തമായ മീനച്ചില്‍ നദിയായി മാറുന്നു.
ഇല്ലിക്കല്‍ കല്ലുമായി ബന്ധപ്പെട്ട് ധാരാളം കഥകളും വിശ്വാസങ്ങളും നിലനില്‍ക്കുന്നുണ്ട്. മുത്തശ്ശി കഥകളിലും സിനിമകളിലുമൊക്കെ കേട്ട് പരിചയമുള്ള നീലക്കൊടുവേലി എന്ന ഔഷധസസ്യം ഇല്ലിക്കല്‍ കല്ലിലുണ്ട് എന്നാണ് പറയപ്പെടുന്നത്. സമ്ബത്ത് വർദ്ധിപ്പിക്കാനും സമൃദ്ധമായ വിളവ് ഉറപ്പാക്കാനും കഴിയുന്ന അമാനുഷിക ശക്തികള്‍ നീലക്കൊടുവേലിയ്ക്ക് ഉണ്ടെന്ന് വിശ്വസിക്കപ്പെടുന്നു. മലഞ്ചെരിവുകളെ നീലനിറത്തില്‍ കുളിപ്പിക്കുന്ന നീല കൊടുവേലിയ്ക്ക് അമാനുഷിക ശക്തികള്‍ ഉണ്ടെന്നാണ് പഴമക്കാ‍‍ർ പറയുന്നത്. കൂനുകല്ലിന് കുറുകെ നരകപാലം (നരകത്തിലേക്കുള്ള പാലം) എന്നറിയപ്പെടുന്ന 1/2 അടി വീതിയുള്ള പാലം ഉണ്ട്. ഇതിന് 20 അടിയിലേറെ താഴ്ചയുള്ള ഒരു വിടവുണ്ടെന്നും നീലക്കൊടുവേലി വളരുന്നത് ഇവിടെയാണെന്നുമാണ് പറയുന്നത്.
നീലക്കൊടുവേലി തേടി പണ്ടുകാലത്ത് നിരവധിയാളുകള്‍ ഇല്ലിക്കല്‍ കല്ല് കയറിയെന്നും അപകടങ്ങള്‍ സംഭവിച്ചെന്നും കഥകളുണ്ട്. എന്നാല്‍, നീലക്കൊടുവേലിയുമായി ബന്ധപ്പെട്ട വിവരങ്ങളൊന്നും പുറത്തുവന്നിട്ടില്ല. ആയിരക്കണക്കിന് അടി ഉയരത്തില്‍ സ്ഥിതി ചെയ്യുന്ന ഇല്ലിക്കല്‍ കല്ലില്‍ എപ്പോഴും ശക്തമായ കാറ്റ് വീശാറുണ്ട്. ഉയരം കൂടിയ പ്രദേശമായതിനാല്‍ ഇടിമിന്നല്‍ അപകടങ്ങള്‍ക്കുള്ള സാധ്യതയും കൂടുതലാണ്. മഴയും തണുപ്പുമുള്ള സമയങ്ങളില്‍ ഇല്ലിക്കല്‍ കല്ലിനെ കോടമഞ്ഞ് മൂടും. ഇത്തരം സന്ദർഭങ്ങളില്‍ പലർക്കും ഇല്ലിക്കല്‍ കല്ല് നേരില്‍ കാണാൻ സാധിക്കാതെ മടങ്ങിപ്പോകേണ്ട സ്ഥിതി പോലും ഉണ്ടാകാറുണ്ട്. മലമുകളില്‍ നിന്ന് നോക്കിയാല്‍ വിദൂര ചക്രവാളത്തില്‍ നേർത്ത നീലരേഖയായി അറബിക്കടല്‍ കാണാം. ഓറഞ്ച് നിറത്തിലുള്ള സൂര്യൻ അസ്തമിക്കുമ്ബോള്‍ മറ്റൊരു സൂര്യനെപ്പോലെ ചന്ദ്രൻ ഉദിച്ചുയരുന്നത് കാണാൻ കഴിയുന്ന പൂർണ്ണചന്ദ്ര ദിനത്തിലെ സൂര്യാസ്തമയം അതിമനോഹരമായ കാഴ്ചയാണ്.
എങ്ങനെ എത്തിച്ചേരാം
ഏറ്റവും അടുത്തുള്ള റെയില്‍വേ സ്റ്റേഷൻ: കോട്ടയം – 55 കിലോമീറ്റർ
ഏറ്റവും അടുത്തുള്ള വിമാനത്താവളം: കൊച്ചിൻ അന്താരാഷ്ട്ര വിമാനത്താവളം – 85 കിലോമീറ്റർ