സമ്മര്‍ ട്രിപ്പ് ഊട്ടിയിലേയ്ക്കാണോ? ഒരിക്കലും മിസ്സാക്കാൻ പാടില്ലാത്ത 4 സ്പോട്ടുകള്‍ ഇതാ
വേനല്‍ക്കാല യാത്ര എന്ന് കേള്‍ക്കുമ്ബോള്‍ തന്നെ ആദ്യം മനസിലേയ്ക്ക് ഓടിയെത്തുന്ന പേരാണ് ഊട്ടി. വേനല്‍ ചൂടില്‍ നിന്ന് രക്ഷനേടാൻ കുടുംബത്തോടൊപ്പവും സുഹൃത്തുക്കള്‍ക്കൊപ്പവുമെല്ലാം നിരവധിയാളുകളാണ് ഊട്ടിയിലേയ്ക്ക് എത്തുന്നത്.എന്നാല്‍, ഊട്ടിയിലെത്തിയാല്‍ എവിടെയൊക്കെ പോകണം, എന്തൊക്കെ ചെയ്യണം എന്ന കാര്യത്തില്‍ പലര്‍ക്കും സംശയമുണ്ടാകാറുണ്ട്. അത്തരത്തില്‍ ഈ സമ്മര്‍ വെക്കേഷനില്‍ ഊട്ടി ട്രിപ്പ് പ്ലാൻ ചെയ്യുന്നവരാണ് നിങ്ങളെങ്കില്‍ ഊട്ടിയില്‍ കണ്ടിരിക്കേണ്ട നാല് സ്ഥലങ്ങളെ കുറിച്ചാണ് ഇനി പറയാൻ പോകുന്നത്.
1. ഊട്ടി ലേക്ക്
ഊട്ടിയിലെത്തുന്നവർ തീർച്ചയായും കണ്ടിരിക്കേണ്ട സ്ഥലമാണ് ഊട്ടി ലേക്ക്. ഇവിടെയുള്ള ബോട്ടിംഗ് ഏത് കാലാവസ്ഥയ്ക്കും അനുയോജ്യമാണ്. ബോട്ടിംഗിന് പുറമെ കുതിര സവാരി, അമ്യൂസ്‌മെന്റ് പാർക്ക്, സൈക്ലിംഗ്, 7D സിനിമ, മിനി ട്രെയിൻ യാത്ര, മിറർ ഹൗസ് എന്നിവയും ഇവിടെയുണ്ട്. രാവിലെ 10 മണി മുതല്‍ വൈകിട്ട് 6.30 വരെയാണ് പ്രവേശന സമയം.
2. നീഡില്‍ വ്യൂ ഹില്‍ടോപ്പ്
ഊട്ടിയുടെ സുന്ദരമായ പ്രകൃതി ദൃശ്യങ്ങളാണ് നീഡില്‍ വ്യൂ ഹില്‍ടോപ്പ് സഞ്ചാരികള്‍ക്കായി കാത്തുവെച്ചിരിക്കുന്നത്. പ്രകൃതി സ്നേഹികള്‍ക്കും സാഹസിക യാത്ര പ്രേമികള്‍ക്കും ഒരുപോലെ അനുയോജ്യമായ സ്ഥലമാണ് ഇവിടം. നീഡില്‍ വ്യൂ ഹില്‍ടോപ്പിന് സൂചിമലൈ എന്നും പേരുണ്ട്. സൂചിയുടെ ആകൃതിയിലുള്ള കുന്നിൻചെരിവായതിനാലാണ് ഈ പേര് ലഭിച്ചത്. ഇവിടെയെത്തുന്നവർക്ക് ട്രെക്കിംഗിന് അവസരമുണ്ട്.
3. അവലാഞ്ചെ ലേക്ക്
പച്ചപ്പ് നിറഞ്ഞുനില്‍ക്കുന്ന അവലാഞ്ചെ തടാകത്തിന്റെ കാഴ്ചകള്‍ ആരുടെയും മനംമയക്കും. ഊട്ടിയില്‍ നിന്ന് 8 കി.മീ അകലെയാണ് അവലാഞ്ചെ ലേക്ക് സ്ഥിതി ചെയ്യുന്നത്. സാഹസിക യാത്രികരുടെ പ്രിയപ്പെട്ട സ്പോട്ടാണിത്. ഇവിടെ ഓഫ് റോഡ് യാത്ര, ട്രെക്കിംഗ്, ക്യാമ്ബിംഗ് എന്നിവ നടത്താൻ സാധിക്കും. പ്രകൃതി സ്നേഹികളെ ആകർഷിക്കുന്ന മനോഹരമായ പൂക്കളുടെ കാഴ്ചകളുടെ ഫോട്ടോഗ്രഫിയ്ക്ക് അനുയോജ്യമായ തടാകവും വെള്ളച്ചാട്ടങ്ങളുമെല്ലാം ഇവിടെയുണ്ട്.
4. ദൊഡ്ഡബെട്ട പീക്ക്
ദക്ഷിണേന്ത്യയിലെ ഏറ്റവും ഉയരം കൂടിയ കൊടുമുടികളിലൊന്നാണ് ദൊഡ്ഡബേട്ട പീക്ക്. സാഹസിക യാത്രികരും ട്രെക്കിംഗ് ഇഷ്ടപ്പെടുന്നവരും തെരഞ്ഞെടുക്കുന്ന ഊട്ടിയിലെ പ്രധാന സ്പോട്ടാണിത്. ഇവിടെ നിന്നാല്‍ ബന്ദിപ്പൂർ ദേശീയോദ്യാനം, ചാമുണ്ഡി ഹില്‍സ് എന്നിവ വിദൂര ദൃശ്യങ്ങളായി കാണാമെന്ന പ്രത്യേകതയുമുണ്ട്.