ദൈവ വരദാനമായി പെയ്തിറങ്ങി താളമേള ഇശലുകൾ; സംസ്ഥാന സ്പെഷ്യൽ സ്കൂൾ കലോത്സവം രണ്ടാം ദിനം വേദികളിൽ ആവേശത്തിൻ്റെ തിരയിളക്കം
തിരൂർ: പരിമിതികളെ അതിജീവിച്ച്, ദൈവ വരദാനമായി പെയ്തിറങ്ങിയ താളമേള ഇശലുകൾ തീർത്ത ആറാമത് സംസ്ഥാന സ്പെഷ്യൽ സ്കൂൾ കലോത്സവത്തിൻ്റെ രണ്ടാം ദിനം വേദികളിൽ ആവേശത്തിൻ്റെ തിരയിളക്കം. ജനപ്രിയ മത്സരങ്ങളായ ഒപ്പന, ഗ്രൂപ്പ് ഡാൻസ്, നാടോടിനൃത്തം തുടങ്ങിയവ അരങ്ങേറിയപ്പോൾ കാഴ്ചയുടെയും കേൾവിയുടെയും ലോകത്തിന് അപ്പുറമുള്ള കലാവിസ്മയമാണ് കാണികൾക്ക് ലഭിച്ചത്.
വിസ്മയമായി ഒപ്പനയും നാടോടിനൃത്തവും
ബധിര, മൂക, കാഴ്ച പരിമിത വിദ്യാർത്ഥികൾ ഒപ്പനയുടെ ഇശലുകൾക്ക് ആവേശകരമായ ചുവടുകൾ വെച്ച് വേദിയെ വിസ്മയിപ്പിച്ചു. സംഗീതം കേൾക്കാൻ കഴിയാത്തവർ പോലും അതിൻ്റെ താളത്തിനൊത്ത് ചലിച്ചപ്പോൾ അത്ഭുതത്തോടെയാണ് കാണികൾ ഈ പ്രകടനം കണ്ടുനിന്നത്. നാടോടിനൃത്തവും അതുപോലെതന്നെ നടന-നൃത്ത വിസ്മയത്തിൻ്റെ പരിമിതിയില്ലാത്ത കലാസ്വാധനയാണ് കാണികൾക്ക് സമ്മാനിച്ചത്. ദൈവത്തിൻ്റെ കയ്യൊപ്പുള്ള ഈ ഭിന്നശേഷി കുട്ടികളുടെ കലാപ്രകടനങ്ങൾ കരളലിയിക്കുന്നതും ഒപ്പം അത്ഭുതപ്പെടുത്തുന്നതുമായിരുന്നു.
പരിശീലകരുടെ സ്നേഹത്തിൻ്റെ ചുവടുകൾ
കലയുടെ ഈ മഹാമേളയിൽ കുട്ടികളോടൊപ്പം തന്നെ കൈയ്യടി നേടിയത് അവരുടെ അധ്യാപകരാണ്. കലാപ്രകടനങ്ങൾ പരിശീലിപ്പിക്കുന്ന അധ്യാപകരുടെ പ്രയത്നവും സമർപ്പണവും അതിരുകളില്ലാത്തതായിരുന്നു. കലാപ്രകടനത്തിനായി കുട്ടികൾ സ്റ്റേജിൽ കയറുന്നതോടെ, വേദിക്ക് മുന്നിൽ നിന്ന് ഓരോ ചുവടുകളും ആംഗ്യങ്ങളും കാട്ടിക്കൊടുക്കുന്ന അധ്യാപകരുടെ സാന്നിധ്യം ശ്രദ്ധയാകർഷിച്ചു. സ്വന്തം പരിമിതികളെ മറികടന്ന് മത്സരാർത്ഥികൾ പ്രകടനം പൂർത്തിയാക്കി സ്റ്റേജ് വിടുന്നതോടെ, പരിശീലകരായ ഈ അധ്യാപകരുടെ മുഖത്ത് തെളിയുന്ന സന്തോഷവും ആത്മനിർവൃതിയും കലയുടെ ഈ മഹത്തായ സന്ദേശത്തെ കൂടുതൽ തിളക്കമുള്ളതാക്കി.