കോട്ടക്കലിൽ ‘ഓപ്പറേഷൻ തൂഫാൻ’: അരലക്ഷം രൂപയുടെ MDMA-യുമായി വളാഞ്ചേരി സ്വദേശി പിടിയിൽ

കോട്ടക്കൽ: വിദ്യാർഥികൾക്കും യുവാക്കൾക്കും ലഹരിമരുന്ന് വിൽപ്പന നടത്തിവന്ന സംഘത്തിലെ പ്രധാനി അരലക്ഷം രൂപ വിലവരുന്ന MDMA-യുമായി പോലീസിന്റെ പിടിയിലായി. ‘ഓപ്പറേഷൻ തൂഫാന്റെ’ ഭാഗമായി നടത്തിയ പരിശോധനയിലാണ് വളാഞ്ചേരി ഇരുമ്പിളിയം വേലിക്കുളം മേച്ചേരിപ്പറമ്പ് സ്വദേശിയും നിലവിൽ കോട്ടക്കൽ പറപ്പൂർ റോഡിൽ വീണാലുക്കലിൽ വാടകയ്ക്ക് താമസിച്ചുവരുന്നതുമായ തുടിമ്മൽ വീട്ടിൽ അബു താഹിറിനെ (37) പോലീസ് അറസ്റ്റ് ചെയ്തത്.
​മലപ്പുറം DANSAF എസ്.എസ്. വിഷ്ണുവിന്റെ നേതൃത്വത്തിൽ മലപ്പുറം, പെരിന്തൽമണ്ണ DANSAF ടീമുകളും കോട്ടക്കൽ പോലീസും സംയുക്തമായി ഇന്ന് പുലർച്ചെയാണ് പരിശോധന നടത്തിയത്. ചങ്കുവെട്ടി തൃശ്ശൂർ റോഡിൽ ബസ് സ്റ്റോപ്പിന് എതിർവശത്തു വെച്ചാണ് പ്രതിയെ കസ്റ്റഡിയിലെടുത്തത്.
​

പിടിച്ചെടുത്തവ:
​MDMA: ചില്ലറ വിപണിയിൽ അരലക്ഷത്തോളം രൂപ വിലമതിക്കുന്ന 12.420 ഗ്രാം MDMA
​ഉപകരണങ്ങൾ: ലഹരിമരുന്ന് തൂക്കി വിൽക്കാൻ ഉപയോഗിക്കുന്ന ഡിജിറ്റൽ ത്രാസ്, MDMA വലിക്കാൻ ഉപയോഗിക്കുന്ന ഗ്ലാസ്സ് ഫ്യുമുകൾ (Glass Fumes)
​വാഹനം: ലഹരി കടത്താൻ ഉപയോഗിച്ച കാർ
​

കോട്ടക്കൽ, ചങ്കുവെട്ടി, ചിനക്കൽ, എടരിക്കോട് തുടങ്ങിയ മേഖലകൾ കേന്ദ്രീകരിച്ച് വിദ്യാർഥികൾക്കും യുവാക്കൾക്കും ലഹരി എത്തിച്ചുനൽകുന്ന പ്രധാന കണ്ണിയാണ് പിടിയിലായ അബു താഹിർ എന്ന് പോലീസ് വ്യക്തമാക്കി. സംഭവത്തിൽ കൂടുതൽ അന്വേഷണം പുരോഗമിക്കുകയാണ്.