ദിയയുടെ കുഞ്ഞിന്റെ പേരില്‍ വ്യാജ ഇന്‍സ്റ്റാഗ്രാം അക്കൗണ്ട് ; പ്രതികരണവുമായി ദിയയും അശ്വിനും
ഇന്‍ഫ്‌ളുവന്‍സറും സംരംഭകയുമായ ദിയ കൃഷ്ണക്ക് കുഞ്ഞു പിറന്ന വാര്‍ത്തയാണ് കഴിഞ്ഞ കുറച്ചു ദിവസങ്ങളായി സോഷ്യല്‍ മീഡിയയിലെ ട്രന്‍ഡിങ്ങ് ടോപ്പിക്കുകളിലൊന്ന്. നിയോം അശ്വിന്‍ കൃഷ്ണ എന്നാണ് കുഞ്ഞിന് പേരിട്ടിരിക്കുന്നത്. കുഞ്ഞ് പിറന്നതിന്റെ സന്തോഷം പങ്കുവെച്ചതിനു പിന്നാലെ ഇന്‍സ്റ്റഗ്രാമില്‍ നിയോമിന്റെ പേരില്‍ ഒരു പ്രൊഫൈലും പ്രത്യക്ഷപ്പെട്ടിരുന്നു. എന്നാല്‍ ഈ പ്രൊഫൈല്‍ ഉണ്ടാക്കിയത് തങ്ങളല്ലെന്നു വ്യക്തമാക്കി രംഗത്ത് എത്തിയിരിക്കുകയാണ് ദിയയും അശ്വിനും.
”ഞങ്ങളുടെ മകന്റെ പേരില്‍ ഒഫീഷ്യല്‍ ഇന്‍സ്റ്റഗ്രാം പേജുകളൊന്നും ഇതുവരെയും ആരംഭിച്ചിട്ടില്ല. അങ്ങനെ എന്തെങ്കിലും കണ്ടാല്‍ അത് സത്യമാണെന്ന് കരുതരുത്. ഭാവിയില്‍ എപ്പോഴെങ്കിലും അവന്റെ പേരില്‍ പേജ് തുടങ്ങുകയാണെങ്കില്‍ അക്കാര്യം എന്റെ ഇന്‍സ്റ്റഗ്രാമിലൂടെത്തന്നെ അറിയിക്കുന്നതായിരിക്കും”, എന്ന് ദിയ ഇന്‍സ്റ്റഗ്രാം സ്റ്റോറിയിലൂടെ അറിയിച്ചു.”ഇത് ഒരു ഫാന്‍പേജ് മാത്രമാണ്, ഞാനോ ദിയയോ ഒദ്യോഗികമായി തുടങ്ങിയതല്ല”, എന്നായിരുന്നു നിയോമിന്റെ പേരിലുള്ള പേജിന്റെ സ്‌ക്രീന്‍ഷോട്ട് പങ്കുവെച്ചുകൊണ്ട് അശ്വിന്‍ ഇന്‍സ്റ്റഗ്രാമിലൂടെ അറിയിച്ചത്.
ഗര്‍ഭിണിയായത് മുതലുള്ള വിശേഷങ്ങളെല്ലാം ദിയ ആരാധകരുമായി പങ്കുവെച്ചിരുന്നു. കുഞ്ഞിന്റെ ജനനത്തോടനുബന്ധിച്ച് ദിയ ചെയ്ത വ്‌ളോഗും നിമിഷനേരം കൊണ്ടാണ് വൈറലായത്. ഇതിനകം എട്ടു മില്യനിലേറെ ആളുകളാണ് ദിയയുടെ വ്‌ളോഗ് കണ്ടത്. നിരവധി പേരാണ് ദിയയെയും കുടുംബത്തെയും പ്രശംസിച്ച് പോസ്റ്റുകള്‍ ഇടുന്നത്, അതോടൊപ്പം തന്നെ ഇത്തരമൊരു വീഡിയോ പങ്കുവെച്ചതിനെ വിമര്‍ശിക്കുന്നവരുമുണ്ട്.
കുഞ്ഞിന് പേരിട്ടത് ദിയ തന്നെയാണെന്ന് കഴിഞ്ഞ ദിവസം അമ്മ സിന്ധു കൃഷ്ണ പങ്കുവെച്ച വീഡിയോയില്‍ പറഞ്ഞിരുന്നു. നിയോം എന്നാല്‍ അറബിക് ഭാഷയില്‍ ഭാവി എന്നാണ് അര്‍ത്ഥമെന്നും ദിയ പുതിയ വ്‌ളോഗില്‍ പറയുന്നുണ്ട്. കഴിഞ്ഞ സെപ്റ്റംബറിലായിരുന്നു ദിയയുടേയും അശ്വിന്റേയും വിവാഹം. ഇരുവരും നേരത്തേ തന്നെ സുഹൃത്തുക്കളായിരുന്നു. സോഫ്റ്റ്വെയര്‍ എഞ്ചിനീയറാണ് അശ്വിന്‍.