ഇന്ന് രാത്രി കേരളത്തില്‍ കാണാം, ചുവന്ന ചന്ദ്രനെ; പൂര്‍ണചന്ദ്രഗ്രഹണം നീണ്ടുനില്‍ക്കുക 82 മിനിറ്റോളം
ഇന്ന് (ഞായറാഴ്ച) രാത്രി നടക്കുന്ന പൂർണചന്ദ്രഗ്രഹണസമയത്ത് ചുവന്ന ചന്ദ്രൻ ദൃശ്യമാകും. രാത്രി പത്ത് മണിക്ക് ശേഷമാണ് കേരളത്തില്‍ ഉള്‍പ്പെടെ ചുവന്ന ചന്ദ്രനെ കാണാൻ കഴിയുക.ജ്യോതിശാസ്ത്ര കൂട്ടായ്മയായ ആസ്ട്രോ കേരളയുടെ നേതൃത്വത്തില്‍ പൂർണചന്ദ്രഗ്രഹണം ആസ്വദിക്കുന്നതിന് ചന്ദ്രോത്സവം 2025 എന്ന പേരില്‍ ചാന്ദ്രനിരീക്ഷണ പരിപാടി നടത്തുന്നുണ്ട്. സംസ്ഥാനതല പരിപാടി കോട്ടയം പാറേച്ചാല്‍ ബൈപ്പാസിലാണ് നടക്കുക. പൂർണചന്ദ്രഗ്രഹണസമയത്ത് ചന്ദ്രൻ ചുവന്ന നിറത്തിലാകുന്ന പ്രതിഭാസത്തെയാണ് ബ്ലഡ് മൂണ്‍ അഥവാ രക്തചന്ദ്രൻ എന്ന് വിളിക്കുന്നത്.
സൂര്യനും ചന്ദ്രനും ഇടയില്‍ ഭൂമി വരുമ്ബോഴാണ് ചന്ദ്രഗ്രഹണം. ഈ സമയത്ത് ഭൂമിയുടെ നിഴല്‍ ചന്ദ്രനെ പൂർണമായി മറയ്ക്കുന്നുവെങ്കിലും, സൂര്യപ്രകാശത്തിന്റെ ഒരു ഭാഗം ഭൂമിയുടെ അന്തരീക്ഷത്തിലൂടെ കടന്നുപോകുമ്ബോള്‍ അപവർത്തനത്തിനും വിസരണത്തിനും വിധേയമാകുന്നു. തരംഗദൈർഘ്യം കുറഞ്ഞ വയലറ്റ്, നീല, പച്ച നിറങ്ങള്‍ അന്തരീക്ഷത്തിലെ സൂക്ഷ്മകണങ്ങളില്‍ തട്ടി പൂർണമായും വിസരണത്തിന് വിധേയമാകുന്നതിനാല്‍ ഈ നിറങ്ങള്‍ ചന്ദ്രനില്‍ പ്രതിഫലിക്കുന്നില്ല.
അതേസമയം, തരംഗദൈർഘ്യം കൂടിയ ഓറഞ്ച്, ചുവപ്പ് നിറങ്ങള്‍ വിസരണത്തിന് അധികം വിധേയമാകാതെ ചന്ദ്രനില്‍ പതിക്കുകയും, പ്രതിഫലിച്ച്‌ നമുക്ക് കാണാനാകുകയും ചെയ്യും. ഇതുമൂലമാണ് പൂർണചന്ദ്രഗ്രഹണ സമയത്ത് ചന്ദ്രൻ പൂർണമായി അപ്രത്യക്ഷമാകാതെ മങ്ങിയ ചുവപ്പ് നിറത്തില്‍ ദൃശ്യമാകുന്നത്.
അനുകൂല കാലാവസ്ഥ ആണെങ്കില്‍ ഞായറാഴ്ച രാത്രി പത്തുമുതല്‍ ചന്ദ്രഗ്രഹണം കാണാം. ഇന്ത്യ, ചൈന, ജപ്പാൻ, പടിഞ്ഞാറൻ ഓസ്ട്രേലിയ, യൂറോപ്പ്, ആഫ്രിക്ക, ന്യൂസിലൻഡ് എന്നിവിടങ്ങളില്‍ ഇത് ദൃശ്യമാകും. ചന്ദ്രഗ്രഹണം ഏകദേശം 82 മിനിറ്റോളം നീണ്ടുനില്‍ക്കുമെന്നാണ് കരുതുന്നത്. കോട്ടയത്തെ ചാന്ദ്രനിരീക്ഷണ പരിപാടിയെക്കുറിച്ച്‌ അറിയാൻ 9656556030 എന്ന നമ്ബറില്‍ വിളിക്കാം.
കേരളത്തില്‍ ഇങ്ങനെ (ഗ്രഹണം ദൃശ്യമാകുന്നതില്‍ പ്രാദേശികമായ സമയ വ്യത്യാസങ്ങള്‍ ഉണ്ടാകാം)
രാത്രി 08:58ഗ്രഹണം ആരംഭിക്കുംരാത്രി 09:57ഭാഗിക ഗ്രഹണം ആരംഭിക്കുംരാത്രി 11:00പൂർണ ഗ്രഹണം ആരംഭിക്കുംരാത്രി 11:41ഗ്രഹണത്തിന്റെ ഏറ്റവും ഉയർന്ന ഘട്ടംപുലർച്ചെ 12:22പൂർണ ഗ്രഹണം അവസാനിക്കുംപുലർച്ചെ 01:26ഭാഗിക ഗ്രഹണം അവസാനിക്കുംപുലർച്ചെ 02:25ഗ്രഹണം അവസാനിക്കും