14കാരിക്ക് വിവാഹ വാഗ്ദാനം നല്‍കി പീഡനം : പിന്തിരിപ്പിക്കാന്‍ ശ്രമിച്ച മാതാപിതാക്കള്‍ക്ക് ഭീഷണി ; 19കാരന്‍ പിടിയില്‍
വെണ്‍മണി സ്വദേശിനിയായ 14 വയസുകാരിയെ വിവാഹ വാഗ്ദാനം നല്‍കി പ്രണയം നടിച്ച് ലൈംഗിക അതിക്രമം ചെയ്ത വെണ്‍മണി ഏറം മുറിയില്‍ കല്ലിടാംകുഴിയില്‍ തുണ്ടില്‍ അച്ചു (19) വിനെ പൊലീസ് അറസ്റ്റ് ചെയ്തു. പെണ്‍കുട്ടിയുമായി പ്രണയത്തിലായ പ്രതി പ്രായപൂര്‍ത്തി ആയാല്‍ വിവാഹം കഴിച്ചുകൊള്ളാമെന്ന് പറഞ്ഞ് 14കാരിയുടെ വിശ്വാസം നേടിയെടുത്തു. ഇതിന് പിന്നാലെ പെണ്‍കുട്ടി താമസിക്കുന്ന വീട്ടിലെത്തി ഭീഷണിപ്പെടുത്തി ലൈംഗിക അതിക്രമം നടത്തുകയായിരുന്നു. മകളെ പീഡിപ്പിക്കുന്നത് തടയാന്‍ ശ്രമിച്ച പെണ്‍കുട്ടിയുടെ മാതാപിതാക്കളെ 19കാരന്‍ ഭീഷണിപ്പെടുത്തുകയും ദേഹോപദ്രവം ഏല്‍പ്പിക്കുകയും ചെയ്തിരുന്നു. ഇതിനാണ് ഇയാളെ അറസ്റ്റ് ചെയ്തത്.
സംഭവത്തിന് ശേഷം ഒളിവില്‍ പോയ പ്രതിയെ തിരുവല്ലാ ഭാഗത്ത് വച്ച് കഴിഞ്ഞ ദിവസം അറസ്റ്റ്‌ചെയ്തു. ചെങ്ങന്നൂര്‍ ജുഡീഷ്യല്‍ ഒന്നാം ക്ലാസ് മജിസ്‌റ്റ്രേറ്റ് കോടതി 1 മുമ്പാകെ ഹാജരാക്കിയ പ്രതിയെ കോടതി 14 ദിവസത്തേക്ക് റിമാന്‍ഡ് ചെയ്തു.