ചരിത്രത്തില്‍ ആദ്യം, അനീഷ് ഇതിനകം തന്നെ ആ നേട്ടം സ്വന്തമാക്കി കഴിഞ്ഞു; സാധാരണക്കാരനായി വന്ന് അസാധാരണ നേട്ടം
ബിഗ് ബോസ് സീസണ്‍ 7 ഗ്രാന്‍ഡ് ഫിനാലെയ്ക്ക് മണിക്കൂറുകള്‍ മാത്രമാണ് ബാക്കി. അനുമോള്‍, അനീഷ്, അക്ബര്‍, നെവിന്‍, ഷാനവാസ് എന്നിവരാണ് അവസാന അഞ്ചില്‍ എത്തിയിരിക്കുന്നത്. ഇവരില്‍ ചരിത്രം സൃഷ്ടിച്ചുകൊണ്ട് വേറിട്ടുനില്‍ക്കുന്നത് ഒരാള്‍ മാത്രമാണ്, അത് മറ്റാരുമല്ല അനീഷ് ടി എ ആണ്. ബിഗ് ബോസ് ചരിത്രത്തില്‍ തന്നെ ഫൈനലില്‍ എത്തുന്ന ആദ്യ കോമണര്‍ ആണ് അനീഷ്. റിയാലിറ്റി ഷോയിലെ അനീഷിന്റെ യാത്ര ശ്രദ്ധേയമായിരുന്നു. വിനോദ രംഗത്ത് മുന്‍പരിചയമുള്ള മിക്ക മത്സരാര്‍ത്ഥികളില്‍ നിന്ന് വ്യത്യസ്തമായി, സെലിബ്രിറ്റി വലയത്തിന് പുറത്ത് നിന്നുള്ള ഒരു സാധാരണക്കാരനായിരുന്നു അനീഷ്.
ബിഗ് ബോസിലെ കോമണേഴ്‌സ്
ബിഗ് ബോസ്സില്‍ നിര്‍ണായക ശക്തിയാകുമെന്ന് പ്രതീക്ഷിക്കുന്നവരാണ് കോമണേഴ്‌സ്. സാധാരണ ജനങ്ങളില്‍ നിന്ന് പ്രത്യേക മത്സരം നടത്തിയാണ് കോമണേഴ്‌സിനെ ബിഗ് ബോസിലേക്ക് തെരഞ്ഞെടുക്കുക. ബിഗ് ബോസ് മലയാളത്തിലെ ആദ്യ കോമണര്‍ ഗോപികയായിരുന്നു. നിര്‍ണായക സാന്നിദ്ധ്യമാകാന്‍ ഗോപികയ്ക്ക് കഴിഞ്ഞിരുന്നു. ആറാം സീസണില്‍ റെസ്മിനും നിഷാനയും കോമണേഴ്‌സായി എത്തി. ഇവരില്‍ റെസ്മിന്‍ ഏതാണ്ട് അവസാന ഘട്ടം വരെ എത്തുകയും ചെയ്തിരുന്നു.
അനീഷിന്റെ വരവ്
മൈജി ഫ്യൂച്ചര്‍ കോണ്‍ടെസ്റ്റിലൂടെ മത്സരത്തില്‍ വിജയിയായാണ് അനീഷ് ബിഗ് ബോസിലേക്ക് എത്തുന്നത്. തൃശൂരിലെ കോടന്നൂര് സ്വദേശിയാണ് അനീഷ്. ബാങ്കില്‍ ജോലിയുണ്ടായിരുന്നു. സര്‍ക്കാര്‍ ജോലി കിട്ടിയിട്ട് അഞ്ച് വര്‍ഷം ലീവെടുത്ത് ബിഗ് ബോസിന് തയ്യാറാകുകയായിരുന്നു അനീഷ് എന്ന പ്രത്യേകതയുമുണ്ട്. എഴുത്തുകാരനുമാണ് അനീഷ്. എന്‍ നേരം തുഴഞ്ഞ് എന്ന പുസ്തകവും എഴുതിയിട്ടുണ്ട്.