‘അവര്‍ യുവാക്കളെങ്കില്‍ ഞങ്ങള്‍ മധ്യവയസ്‌കര്‍, ബാംഗ്ലൂര്‍ ഡേയ്‌സ് ഞങ്ങള്‍ റീമേക്ക് ചെയ്ത് നശിപ്പിച്ചു” ; റാണ ദഗുബട്ടി
അഞ്ജലി മേനോന്റെ സംവിധാനത്തില്‍ സൂപ്പര്‍ഹിറ്റായി മാറിയ ബാംഗ്ലൂര്‍ ഡേയ്‌സ് എന്ന ചിത്രം തമിഴില്‍ റീമേക്ക് ചെയ്ത് തങ്ങള്‍ നശിപ്പിച്ചു എന്ന് നടന്‍ റാണ ദഗുബട്ടി. ദുല്‍ഖര്‍ സല്‍മാന്‍, നിവിന്‍ പോളി, ഫഹദ് ഫാസില്‍, നസ്രിയ നസീം, പാര്‍വതി തിരുവോത്ത്, ഇഷ തല്‍വാര്‍ തുടങ്ങിയവര്‍ വേഷമിട്ട ബാംഗ്ലൂര്‍ ഡെയ്സിന്റെ തമിഴ് പതിപ്പില്‍ ആര്യ, ബോബി സിംഹ, റാണ ദഗുബട്ടി, പാര്‍വതി തിരുവോത്ത്, ലക്ഷ്മി റായ് എന്നിവരായിരുന്നു അഭിനയിച്ചത്.
‘ഞാനും ദുല്‍ഖറും സ്‌കൂള്‍മേറ്റ്‌സ് ആണ്, ദുല്‍ഖര്‍ അഭിനയിച്ചതില്‍ എനിക്ക് ആദ്യം വളരെ ഇഷ്ട്ടം തോന്നിയത് ബാംഗ്ലൂര്‍ ഡേയ്‌സിലെ കഥാപാത്രത്തോടാണ്. ഞങ്ങള്‍ ആ ചിത്രം തമിഴിലേയ്ക്ക് റീമേക്ക് ചെയ്തു നശിപ്പിച്ച് കളഞ്ഞു. ചിത്രത്തിന്റെ ഷൂട്ടിങ്ങിനിടയില്‍ നടന്‍ ആര്യ എന്നോട് പറഞ്ഞത് ഇപ്പോഴും ഓര്‍ക്കുന്നു, ‘മച്ചാ നോക്ക് ദുല്‍ഖറിനെയും നിവിനേയും, ചെറുപ്പക്കാര്‍ പിള്ളേരാണ്, നമ്മളെ കണ്ടാല്‍ റിട്ടയര്‍ ജീവിതം നയിക്കുന്ന മധ്യവയസ്‌ക്കരെ പോലെയുണ്ട്” റാണ ദഗുബട്ടി പറഞ്ഞു.
ഭാസ്‌കര്‍ സംവിധാനം ചെയ്ത ‘ബാംഗ്ലൂര്‍ നാട്ട്ക്കള്‍’ എന്ന തമിഴ് പതിപ്പില്‍ റാണ ദഗുബട്ടി ഫഹദ് ഫാസിലിന്റെ വേഷവും, ആര്യ ദുല്‍ഖറിന്റെ വേഷവും, ബോബി സിംഹ നിവിന്‍ പോളിയുടെ വേഷവുമാണ് അവതരിപ്പിച്ചത്. ചിത്രം ബോക്‌സോഫീസില്‍ വമ്പന്‍ പരാജയമായി മാറിയിരുന്നു. ചിത്രത്തിന്റെ ഹിന്ദി പതിപ്പിന്റെ വിധിയും മറ്റൊന്നായിരുന്നില്ല.
ദുല്‍ഖര്‍ സല്‍മാനും, റാണ ദഗുബട്ടിയും ഒരുമിച്ച് അഭിനയിക്കുന്ന തമിഴ് ചിത്രം കാന്തയുടെ പ്രമോഷന്റെ ഭാഗമായി ഇരുവരും സുധിര്‍ ശ്രീനിവാസന്റെ യൂട്യൂബ് ചാനലിന് നല്‍കിയ അഭിമുഖത്തില്‍ സംസാരിക്കുകയായിരുന്നു റാണ ദഗുബട്ടി. ബ്ലാക്ക് ആന്‍ഡ് വൈറ്റ് കാലഘട്ടത്തിലെ ഒരു തമിഴ് സൂപ്പര്‍താരത്തിന്റെ കഥ പറയുന്ന ചിത്രത്തില്‍ റാണ ദഗുബട്ടി ഒരു പോലീസ് ഉദ്യോഗസ്ഥന്റെ വേഷത്തിലാണ് പ്രത്യക്ഷപ്പെടുക.