ഭീകരരെ കുറിച്ച് വിവരം നല്‍കുന്നവര്‍ക്ക് 5 ലക്ഷം രൂപ പാരിതോഷികം; ജമ്മു കശ്മീരില്‍ വ്യാപക റൈഡുമായി പൊലീസ്
ഭീകരതയ്ക്കെതിരെ സമൂഹ പങ്കാളിത്തം ശക്തമാക്കാന്‍ ജമ്മു കശ്മീര്‍ പോലീസ്. ഭീകരരെ കുറിച്ച് വിവരം നല്‍കുന്നവര്‍ക്ക് വന്‍ സമ്മാനങ്ങള്‍ പ്രഖ്യാപിച്ചു. വിശ്വസനീയവും നിര്‍ദ്ദിഷ്ടവും പ്രവര്‍ത്തനക്ഷമവുമായ വിവരങ്ങള്‍ നല്‍കുന്നവര്‍ക്ക് 5 ലക്ഷം രൂപ പാരിതോഷികം നല്‍കാനാണ് തീരുമാനം.
വിവരം നല്‍കുന്നവരുടെ ഐഡന്റിറ്റി തികച്ചും രഹസ്യമായി സൂക്ഷിക്കുമെന്ന് ജമ്മു കശ്മീര്‍ പോലീസ് അറിയിച്ചു. അതിര്‍ത്തി ജില്ലയായ പൂഞ്ചില്‍ ആണ് ആദ്യ ഘട്ടത്തില്‍ ഇത് നടപ്പാക്കുക.2021 മുതല്‍ ഭീകരവാദ പ്രവര്‍ത്തനങ്ങളുടെ കേന്ദ്രബിന്ദുവാണ് ഈ പ്രദേശം.
ഭീകരര്‍ക്ക് ഭക്ഷണം, പാര്‍പ്പിടം, അവശ്യവസ്തുക്കള്‍ എന്നിവ വിതരണം ചെയ്യുന്ന വ്യക്തികള്‍, ഗതാഗതം അല്ലെങ്കില്‍ സുരക്ഷിതമായ വീടുകള്‍ നല്‍കുന്നവര്‍, തീവ്രവാദികളുമായി ആശയവിനിമയം നിലനിര്‍ത്തുന്നവര്‍, സുരക്ഷാ സേനയുടെ നീക്കങ്ങളെക്കുറിച്ച് രഹസ്യ വിവരങ്ങള്‍ കൈമാറുന്നവര്‍, അല്ലെങ്കില്‍ ഭീകര പ്രവര്‍ത്തനങ്ങള്‍ക്കുള്ള ധനസഹായം, റിക്രൂട്ട്‌മെന്റ്, നെറ്റ്വര്‍ക്കിംഗ് നടത്തുന്നവരെ കുറിച്ച് അറിയിക്കണമെന്നും പൊലീസ് പൊതുജനങ്ങളോട് അഭ്യര്‍ത്ഥിച്ചു.