വെനസ്വേലയുടെ വ്യോമമേഖല അടച്ചതായി കണക്കാക്കണമെന്ന് ട്രംപ്; പ്രഖ്യാപനം കൊളോണിയലിസ്റ്റ് ഭീഷണിയാണെന്ന് വെനസ്വേല
വെനസ്വേലയുടെ വ്യോമമേഖല അടച്ചതായി കണക്കാക്കണമെന്ന് അമേരിക്കന്‍ പ്രസിഡന്റ് ഡോണള്‍ഡ് ട്രംപ്. മയക്കുമരുന്ന് കടത്ത് ആരോപിച്ച് വെനസ്വേലന്‍ പ്രസിഡന്റ് നിക്കോളാസ് മഡൂറോയെ വിദേശ ഭീകരസംഘടനയുടെ അംഗമായി പ്രഖ്യാപിച്ചതിനു പിന്നാലെയാണ് വ്യോമമേഖല അടച്ചതായി ട്രംപിന്റെ പ്രഖ്യാപനം. വെനസ്വേലയ്ക്കെതിരായ അമേരിക്കന്‍ സൈനിക നടപടിയുടെ മുന്നൊരുക്കമാണിതെന്നാണ് വിലയിരുത്തല്‍. ട്രംപിന്റെ പ്രഖ്യാപനം കൊളോണിയലിസ്റ്റ് ഭീഷണിയാണെന്നും വെനസ്വേലയിലെ ജനതയ്ക്കെതിരായ നിയമവിരുദ്ധവും നീതികരിക്കാനാകാത്തതുമായ ആക്രമണമാണെന്നും വെനസ്വേലന്‍ വിദേശകാര്യമന്ത്രാലയം പ്രതികരിച്ചു.
വെനസ്വേലയ്ക്ക് മുകളിലൂടെ പറക്കുന്നത് അപകടകരമാണെന്ന് ട്രംപ് കഴിഞ്ഞയാഴ്ച മുന്നറിയിപ്പ് നല്‍കിയതിനെതുടര്‍ന്ന് സര്‍വീസ് നിര്‍ത്തിയ ആറ് വിമാനക്കമ്പനികള്‍ വെനസ്വേലയില്‍ ഇറങ്ങുന്നത് വിലക്കിയിരുന്നു. മറ്റൊരു രാജ്യത്തിന്റെ വ്യോമമേഖല അടച്ചതായി പ്രഖ്യാപിക്കാന്‍ അമേരിക്കയ്ക്ക് അവകാശമില്ല.
വ്യോമാതിര്‍ത്തിയില്‍ എന്തെങ്കിലും തടസ്സം ഉണ്ടായാല്‍ അമേരിക്കയില്‍ നിന്നുള്ള വെനിസ്വേലന്‍ കുടിയേറ്റക്കാരെ തിരിച്ചയയ്ക്കുന്ന വിമാനങ്ങള്‍ നിര്‍ത്തിവയ്ക്കുമെന്ന് മന്ത്രാലയം മുന്നറിയിപ്പ് നല്‍കി. ട്രംപ് ഭരണകൂടം വെനിസ്വേലയില്‍ സമ്മര്‍ദ്ദം ശക്തമാക്കുകയും ലോകത്തിലെ ഏറ്റവും വലിയ വിമാനവാഹിനിക്കപ്പല്‍ ഉള്‍പ്പെടെ കരീബിയനില്‍ സൈനിക സന്നാഹങ്ങള്‍ വിന്യസിക്കുകയും ചെയ്ത സാഹചര്യത്തിലാണ് വെനസ്വേലയുടെ മുന്നറിയിപ്പ്.
മയക്കുമരുന്ന് കടത്ത് തടയുക എന്നതാണ് തങ്ങളുടെ പ്രവര്‍ത്തനങ്ങളുടെ ലക്ഷ്യമെന്ന് വാഷിംഗ്ടണ്‍ വാദിക്കുമ്പോള്‍, യഥാര്‍ത്ഥ ലക്ഷ്യം ഭരണമാറ്റമാണെന്ന് വെനസ്വേല ആരോപിക്കുന്നു. സെപ്റ്റംബര്‍ ആദ്യം മുതല്‍, കരീബിയന്‍ കടലിലും കിഴക്കന്‍ പസഫിക് സമുദ്രത്തിലും മയക്കുമരുന്ന് കടത്തുന്നതായി ആരോപിക്കപ്പെടുന്ന 20 ലധികം കപ്പലുകളില്‍ യുഎസ് സൈന്യം ആക്രമണം നടത്തിയിരുന്നു.
