വിജയ് ഹസാരെ ട്രോഫി കളിക്കാൻ തയ്യാര്‍; വിരാട് കോഹ്ലി സമ്മതം അറിയിച്ചതായി റിപ്പോര്‍ട്ട്
ഇന്ത്യൻ ആഭ്യന്തര ക്രിക്കറ്റിലേക്ക് തിരിച്ചുവരാൻ തയ്യാറായി സൂപ്പർതാരം വിരാട് കോഹ്ലി. ഏകദിന ക്രിക്കറ്റില്‍ തുടരാൻ ആഗ്രഹിക്കുന്നതിനാല്‍ വിജയ് ഹസാരെ ട്രോഫിയില്‍ കളിക്കാൻ കോഹ്ലി ബിസിസിഐയെ സമ്മതം അറിയിച്ചതായാണ് റിപ്പോർട്ട്.2027 ഏകദിന ലോകകപ്പ് കളിക്കാൻ ആഗ്രഹിക്കുന്നുവെങ്കില്‍ ആഭ്യന്തര ക്രിക്കറ്റ് കളിച്ച്‌ മികവ് നിലനിർത്തണമെന്ന് മുതിർന്ന താരങ്ങളായ വിരാട് കോഹ്‍ലിക്കും രോഹിത് ശർമയ്ക്കും ബിസിസിഐ മുന്നറിയിപ്പ് നല്‍കിയിരുന്നു. രോഹിത് ശർമ നേരത്തെ തന്നെ ആഭ്യന്തര ക്രിക്കറ്റ് കളിക്കാൻ തയ്യാറാണെന്ന് ബിസിസിഐയെ അറിയിച്ചിരുന്നു.
ദക്ഷിണാഫ്രിക്കയ്ക്കെതിരായ ഏകദിന പരമ്ബര അവസാനിച്ചാല്‍, കോഹ്‌ലിയോ രോഹിത്തോ ആഭ്യന്തര ക്രിക്കറ്റ് കളിക്കാൻ തയ്യാറാകുന്നില്ലെങ്കില്‍ കർശന നിലപാട് സ്വീകരിക്കുമെന്ന് ഇന്ത്യൻ ക്രിക്കറ്റ് ടീം മുഖ്യ സെലക്ടർ അജിത് അഗാർക്കർ ഇതിനോടകം സൂചന നല്‍കിയിട്ടുണ്ടെന്ന് ടൈംസ് ഓഫ് ഇന്ത്യയുടെ റിപ്പോർട്ടില്‍ പറയുന്നു. ദക്ഷിണാഫ്രിക്കയ്ക്കെതിരായ ഏകദിന പരമ്ബര അവസാനിച്ചതിന് ശേഷം കോഹ്ലി ലണ്ടനിലേക്ക് മടങ്ങും. പിന്നീട് തിരികെയെത്തി ഡല്‍ഹി ടീമിനൊപ്പം കുറച്ച്‌ മത്സരങ്ങളില്‍ കളിക്കാനാണ് സാധ്യത.
ഡിസംബർ 24 മുതലാണ് വിജയ് ഹസാരെ ട്രോഫി ക്രിക്കറ്റ് ടൂർണമെന്റ് ആരംഭിക്കുന്നത്. ദക്ഷിണാഫ്രിക്കൻ പരമ്ബര കഴിഞ്ഞാല്‍ ഇന്ത്യൻ ടീമിന് ഇനി ജനുവരിയിലാണ് ഏകദിന പരമ്ബര നടക്കാനുള്ളത്. ന്യൂസിലാൻഡിനെതിരായ മൂന്ന് ഏകദിനങ്ങളുടെ പരമ്ബര ജനുവരി 11നാണ് ആരംഭിക്കുക. ഇതിന് മുമ്ബാകും കോഹ്ലി, രോഹിത് എന്നിവർ ആഭ്യന്തര ക്രിക്കറ്റ് കളിക്കുക.