Fincat

ജോര്‍ജുകുട്ടിയെ കാണാൻ കാട്ടാളനിലെ പിള്ളേര്‍ എത്തി.. ലാലേട്ടനൊപ്പം ഹനാൻ ഷായും പെപ്പെയും


ആൻ്റണി വർഗീസ് പെപ്പെയെ നായകനാക്കി ഷരീഫ് മുഹമ്മദ് നിർമ്മിക്കുന്ന ‘കാട്ടാളൻ’ സിനിമയുടെ ചിത്രീകരണം പുരോഗമിക്കുകയാണ്.സിനിമയില്‍ ഗായകൻ ഹനാൻ ഷായും പ്രധാന വേഷത്തിലെത്തുന്നുണ്ട്. സിനിമയുടെ ചിത്രീകരണത്തിനിടെ ഇരുവരും മോഹൻലാലിനെ കണ്ടു മുട്ടിയ ചിത്രം പങ്കുവെച്ചിരിക്കുകയാണ്. ദൃശ്യം 3 സിനിമയുടെ ലൊക്കേഷനില്‍ ചെന്നാണ് പെപ്പയും ഹനാൻ ഷായും മോഹൻലാലിനെ കണ്ടിരിക്കുന്നത്. സിനിമയിലെ ജോർജുകുട്ടിയുടെ ലുക്കിലായിരുന്നു മോഹൻലാല്‍. ലാലേട്ടനൊപ്പമുള്ള ചിത്രങ്ങള്‍ നടന്മാർ സോഷ്യല്‍ മീഡിയയില്‍ പങ്കുവെച്ചിരിക്കുന്നത് ആരാധക ശ്രദ്ധ നേടുകയാണ്.
ആന്റണി വർഗീസ് പങ്കുവെച്ച ചിത്രങ്ങളുടെ ക്യാപ്ഷനും ആരാധകർ ആഘോഷിക്കുന്നുണ്ട്. ‘ലാലേട്ടൻ : മോനെ, ഇവിടെ വന്നാല്‍ ഫോട്ടോ എടുക്കണം എന്ന് നിർബന്ധാ… ലെ ഞാൻ : Thank you ലാലേട്ടാ’ എന്നാണ് പോസ്റ്റിന് ആന്റണി നല്‍കിയ ക്യാപ്ഷൻ. മോഹൻലാല്‍ എന്തൊരു സിംപിള്‍ ആണെന്നാണ് ആരാധകർ ചോദിക്കുന്നത്. നവാഗതനായ പോള്‍ ജോർജ്ജ് സംവിധാനം നിർവ്വഹിക്കുന്ന ചിത്രമാണ് കാട്ടാളൻ. സിനിമയില്‍ ഏറെ പ്രതീക്ഷ വെച്ച്‌ കാത്തിരിക്കുകയാണ് പ്രേക്ഷകർ.

അതേസമയം, മോഹന്‍ലാല്‍ – ജീത്തു ജോസഫ് കൂട്ടുകെട്ടിലൊരുങ്ങിയ ഏറ്റവും വലിയ ഹിറ്റുകളിലൊന്നായ ദൃശ്യത്തിന്റെ മൂന്നാം ഭാഗത്തിനായുള്ള കാത്തിരിപ്പിലാണ് പ്രേക്ഷകര്‍. ഡിസംബര്‍ ആദ്യ വാരത്തോടെ ഷൂട്ടിംഗ് പൂര്‍ത്തിയാകുമെന്നും 2026ല്‍ ചിത്രം തിയേറ്ററില്‍ എത്തുമെന്നാണ് റിപ്പോര്‍ട്ടുകള്‍. മലയാളത്തിലെ ആദ്യ 50 കോടി ചിത്രമായിരുന്നു ദൃശ്യം. 2013 ഡിസംബർ 19 ന് പുറത്തിറങ്ങിയ ചിത്രം അന്നുവരെയുള്ള എല്ലാ റെക്കോർഡുകളുമാണ് തകർത്തെറിഞ്ഞത്. 2021 ഫെബ്രുവരി 19 നാണ് ദൃശ്യം രണ്ടാം ഭാഗം പുറത്തിറങ്ങുന്നത്. ആമസോണ്‍ പ്രൈമിലൂടെ ഒടിടി റിലീസായിട്ടായിരുന്നു ചിത്രം പ്രേക്ഷകരിലേക്ക് എത്തിയത്.

1 st paragraph