മാങ്കൂട്ടത്തെ സപ്പോര്ട്ട് ചെയ്ത രാഹുല് ഈശ്വറിനെതിരെയുള്ള അറസ്റ്റ്: ഇന്ന് കോടതിയില് ഹാജരാക്കും, മറ്റ് പ്രതികള്ക്ക് നോട്ടീസ് നല്കും
രാഹുല് മാങ്കൂട്ടത്തിലിനെതിരെ പീഡന പരാതി നല്കിയ സ്ത്രീക്കെതിരെ സൈബര് അധിക്ഷേപം നടത്തിയതിന് അറസ്റ്റിലായ രാഹുല് ഈശ്വറിനെ ഇന്ന് കോടതിയില് ഹാജരാക്കും. ഇന്നലെ രാത്രിയാണ് ജാമ്യമില്ലാ വകുപ്പ് ചുമത്തി രാഹുലിനെ അറസ്റ്റ് ചെയ്തത്. രാഹുലിനൊപ്പം കേസില് പ്രതി ചേര്ക്കപ്പെട്ട സന്ദീപ് വാര്യര്, രജിത പുളിക്കന്, ദീപാ ജോസഫ് എന്നിവര്ക്കെതിരെയും നടപടിയുണ്ടാകും. ഇവര്ക്ക് ഹാജരാകാനായി സൈബര് പൊലിസ് നോട്ടീസ് നല്കും. പരാതിക്കാരിക്കെതിരെ മോശം കമന്റുകള് ചെയ്തവര്ക്കെതിരെയും കേസെടുക്കും. പരാതിക്കാരിക്കെതിരായ മോശം പരാമര്ശങ്ങള് നീക്കം ചെയ്യാന് ഫെയ്സ് ബുക്കിനോടും പൊലീസ് ആവശ്യപ്പെട്ടിട്ടുണ്ട്.
അന്വേഷണത്തിന്റെ ഭാഗമായി രാഹുല് ഈശ്വറിന്റെ മൊബൈല് ഫോണ് പൊലീസ് കസ്റ്റഡിയിലെടുത്തിരുന്നു. ലാപ്പ്ടോപ്പില് നിന്നാണ് വീഡിയോ അപ്ലോഡ് ചെയ്തതെന്നായിരുന്നു രാഹുല് ഈശ്വറിന്റെ ആദ്യമൊഴി. പിന്നീട് ഓഫീസില് പരിശോധന നടത്താനിറങ്ങിയപ്പോള് മൊബൈല് കൈമാറുകയായിരുന്നു. പരിശോധനയില് മൊബൈലിലെ ഒരു ഫോള്ഡറില് അപ്ലോഡ് ചെയ്ത വീഡിയോ പൊലീസ് കണ്ടെത്തി. കേസില് നാലു പേരെയാണ് പ്രതിചേര്ത്തിട്ടുള്ളത്. രഞ്ജിത പുളിക്കന്, അഡ്വ. ദീപ ജോസഫ്, സന്ദീപ് വാര്യര്, രാഹുല് ഈശ്വര്. ദീപ ജോസഫ് രണ്ടു പോസ്റ്റുകളിലൂടെ പരാതിക്കാരിയെ അപമാനിച്ചുവെന്ന് പൊലീസ് പറയുന്നു. രാഹുല് ഈശ്വറെ പൊലീസ് ചോദ്യം ചെയ്യാനായി വിളിപ്പിക്കുകയും പിന്നീട് എആര് ക്യാമ്പില് വെച്ച് വിശദമായി ചോദ്യം ചെയ്യുകയുമായിരുന്നു. രാഹുല് ഈശ്വര് ഉള്പ്പെടെ 4 പേരുടെ യുആര്എല് ഐഡികളാണ് പരാതിക്കാരി സമര്പ്പിച്ചത്. ഇത് പരിശോധിച്ചതിന് ശേഷമാണ് പൊലീസ് തുടര്നടപടികളിലേക്ക് കടന്നത്. കോണ്ഗ്രസ് നേതാവായ സന്ദീപ് വാര്യരുടേയും രണ്ടു വനിതകളുടേയും അടക്കം യുആര്എല് ഉള്പ്പെടെ നല്കിയ പരാതിയിലാണ് പൊലീസിന്റെ നിര്ണായക നീക്കം.