പാസ്പോര്ട്ടും എമിറേറ്റ്സ് ഐഡിയും ഒരുമിച്ച് പുതുക്കാം, പുതിയ സേവനം ആരംഭിച്ച് യുഎഇ
അബുദാബി: യുഎഇയില് പാസ്പോര്ട്ട്, എമിറേറ്റ്സ് ഐഡി കാര്ഡ് പുതുക്കല് ഇനി ഒറ്റ അപേക്ഷയില്. പൗരന്മാര്ക്കുള്ള ഭരണപരമായ നടപടിക്രമങ്ങള് ലളിതമാക്കുന്നതിന്റെ ഭാഗമായി, യുഎഇയിലെ ഫെഡറല് അതോറിറ്റി ഫോര് ഐഡന്റിറ്റി, സിറ്റിസണ്ഷിപ്പ്, കസ്റ്റംസ് ആന്ഡ് പോര്ട്ട് സെക്യൂരിറ്റി (ICP), പാസ്പോര്ട്ടും എമിറേറ്റ്സ് ഐഡി കാര്ഡും ഒന്നിച്ച് പുതുക്കാനുള്ള പുതിയ സേവനം ആരംഭിച്ചു. ഇതോടെ പൗരന്മാര്ക്ക് ഈ രണ്ട് രേഖകളും വെവ്വേറെ പുതുക്കേണ്ട ബുദ്ധിമുട്ട് ഒഴിവാക്കാം. കൂടാതെ വ്യത്യസ്ത കാലഹരണ തീയതികള് ഓര്മിച്ചു വയ്ക്കേണ്ട സാഹചര്യവും ഇല്ലാതാകും.
‘സീറോ ബ്യൂറോക്രസി’ (Zero Bureaucracy) ഇനിഷ്യേറ്റീവിന്റെ ഭാഗമായി പ്രഖ്യാപിച്ച ഈ പുതിയ സംവിധാനം, എമിറാത്തി പൗരന്മാര്ക്ക് UAEICP സ്മാര്ട്ട് ആപ്ലിക്കേഷന് വഴി രണ്ട് രേഖകളും ഒരേസമയം പുതുക്കാന് അവസരം നല്കുന്നു. വെവ്വേറെ അപേക്ഷകളും നടപടിക്രമങ്ങളും ഒഴിവാക്കുന്നതിലൂടെ ഈ സേവനം വഴി സമയം ലാഭിക്കാം. പാസ്പോര്ട്ട് കാലഹരണപ്പെടുകയും എമിറേറ്റ്സ് ഐഡി 6 മാസത്തിനുള്ളില് കാലഹരണപ്പെടാന് സാധ്യതയുണ്ടെങ്കില് ഒരേ പേജില് രണ്ട് രേഖകളും ഒരുമിച്ച് പുതുക്കാനുള്ള ഓപ്ഷന് ആപ്ലിക്കേഷനില് ലഭിക്കും.
നേരത്തെ, താമസക്കാര് ഓരോ രേഖയ്ക്കും വെവ്വേറെ പുതുക്കല് നടപടിക്രമങ്ങള് പൂര്ത്തിയാക്കേണ്ടതുണ്ടായിരുന്നു, അതിലൂടെ വ്യത്യസ്ത ഫോമുകളും പേയ്മെന്റ് രീതികളും കൈകാര്യം ചെയ്യേണ്ടി വന്നിരുന്നു. എന്നാല് ഇപ്പോള് വ്യക്തിഗത വിവരങ്ങള് അവലോകനം ചെയ്യുന്നതു മുതല് അന്തിമ അപേക്ഷ സമര്പ്പിക്കുന്നത് വരെ മുഴുവന് പ്രക്രിയയും ഒറ്റ ഇടപാടിലൂടെ പൂര്ത്തിയാക്കാന് കഴിയും.
