സ്കൂട്ടറിന്റെ പിന്സീറ്റിലിരുന്ന യുവാവിന്റെ തലയില് മരക്കൊമ്പ് പൊട്ടിവീണ് ദാരുണാന്ത്യം
തിരുനനന്തപുരം പാലോട് – ഇടിഞ്ഞാര് റോഡില് മരക്കൊമ്പ് വീണ് യുവാവ് മരിച്ചു. ഇടിഞ്ഞാര് കല്യാണിക്കരികത്ത് ഹര്ഷകമാര് എന്ന് വിളിക്കുന്ന ഷൈജു (47) ആണ് മരിച്ചത്. റോഡുവക്കില് ഉണങ്ങി നിന്ന മാഞ്ചിയം മരം ഒടിഞ്ഞു സ്കൂട്ടര് യാത്രികനായ യുവാവിന്റെ തലയില് വീഴുകയായിരുന്നു. ഇന്നലെ രാത്രി 10.30 മണിയോടെയാണ് അപകടം. ബ്രൈമൂര് – പാലോട് റൂട്ടില് മുല്ലച്ചല് വളവിലാണ് അപകടം ഉണ്ടായത്.
സുഹൃത്തിന്റെ മകളുടെ വിവാഹ റിസപ്ഷനില് പങ്കെടുത്ത് വീട്ടിലേയ്ക്ക് മടങ്ങവേയാണ് ദാരുണമായ സംഭവം. ബന്ധുവായ ജോയി ഓടിച്ചിരുന്ന ടൂ വീലറില് പിന്സീറ്റ് യാത്രക്കാരനായിരുന്ന ഷൈജുവിന്റെ തലയിലാണ് മരം ഒടിഞ്ഞു വീണത്.
തല പൊട്ടി റോഡില് വീണ ഷൈജു തത്ക്ഷണം മരിച്ചു. ഉടന് തന്നെ വനം വകുപ്പ് ഉദ്യോഗസ്ഥരും നാട്ടുകാരും ചേര്ന്ന് പാലോട് ആശുപത്രിയില് എത്തിച്ചു. മൃതദേഹം ഉടന് തിരുവനന്തപുരം മെഡിക്കല് കോളേജ് ആശുപത്രി മോര്ച്ചറിയിലാണ്. പോസ്റ്റ്മോര്ട്ടത്തിന് ശേഷം കുടുംബത്തിന് വിട്ടുനല്കും. സംഭവത്തില് പാലോട് പൊലീസ് കേസ് എടുത്തു. ഭാര്യ: സീന, മക്കള്: ഫേബ, അബിന്.
