സംസ്ഥാനത്ത് പരക്കെ മഴ; ഏഴ് ജില്ലകളിലെ വിദ്യാഭ്യാസ സ്ഥാപനങ്ങള്ക്ക് ഇന്ന് അവധി
സംസ്ഥാനത്ത് പരക്കെ മഴയും മലയോരമേഖലകളില് ഉരുള്പൊട്ടലും മണ്ണിടിച്ചിലും ഉള്പ്പെടെ നിലനില്ക്കുന്ന പശ്ചാത്തലത്തില് ഏഴ് ജില്ലകളിലെ വിദ്യാഭ്യാസ സ്ഥാപനങ്ങള്ക്ക് അവധി പ്രഖ്യാപിച്ചു. ഇടുക്കി, കോട്ടയം, വയനാട്, പാലക്കാട്, കോഴിക്കോട്, മലപ്പുറം, ആലപ്പുഴ ജില്ലകളിലെ വിദ്യാഭ്യാസ സ്ഥാപനങ്ങള്ക്കാണ് ഇന്ന് അവധി നല്കിയിരിക്കുന്നത്.
സംസ്ഥാനത്ത് മലയോര മേഖലയില് കനത്തമഴ തുടരുന്ന സാഹചര്യത്തില് സംസ്ഥാന സഹകരണ യൂണിയന് നടത്തുന്ന ഇന്നത്തെ HDC & BM പരീക്ഷകള് മാറ്റി വെച്ചു. പുതിയ തിയ്യതി പിന്നീട് അറിയിക്കും. അതേസമയം മുന്കൂട്ടി നിശ്ചയിച്ച യൂണിവേഴ്സിറ്റി, പി.എസ്.എസി. പരീക്ഷകള് എന്നിവയ്ക്ക് മാറ്റമില്ല. കരിപ്പൂര് വിമാനത്താവളത്തില് പുലര്ച്ചെ 3.30 ഇറങ്ങേണ്ട സലാലയില് നിന്നുള്ള സലാം എയര് കനത്ത മഴയെ തുടര്ന്ന് കൊച്ചിയിലേക്ക് വഴി തിരിച്ച് വിട്ടു. മലങ്കര, നെയ്യാര്, അരുവിക്കര ഡാമുകളുടെ ഷട്ടറുകള് ഉയര്ത്തും.
കോട്ടയം തീക്കോയിയില് നിരവധി വീടുകള് വെള്ളം കയറി. വാഹനങ്ങള് ഒലിച്ചുപോയി. ഈരാറ്റുപേട്ടയും പാലായും വെള്ളത്തിലാണ്. ഇടുക്കി കോലാഹലമേട്ടിലും ഏലപ്പാറയിലും വീടിന് മുകളിലേക്ക് മണ്ണിടിഞ്ഞു. രണ്ടിടങ്ങളിലുമായി രണ്ട് പേര് കുടുങ്ങി കിടക്കുന്നുവെന്നാണ് വിവരം. ഉപ്പുതറയില് പൊലീസ് ജീപ്പിന് മുകളിലേക്ക് മണ്ണിടിഞ്ഞു. തലനാരിഴയ്ക്കാണ് പൊലീസുകാര് രക്ഷപ്പെട്ടത്. കൊക്കയാര് ചപ്പാത്തില് ദുരിതാശ്വാസ ക്യാമ്പ് തുറന്നു.
