ഗംഗാ നദിയിൽ ബോട്ടപകടം; 11 പേർക്ക് മരിച്ചു
ബിഹാറിലെ ഹാജിപുരില്‍ ഗംഗാ നദിയില്‍ യാത്രാബോട്ട് മറിഞ്ഞ് 11 പേര്‍ക്ക് ദാരുണാന്ത്യം. റാംപൂര്‍ ശ്യാംചന്ദ് ഗ്രാമത്തിന് സമീപം രഘോപുര്‍ പൊലീസ് സ്റ്റേഷന്‍ പരിധിയിലാണ് അപകടമുണ്ടായത്. ബോട്ടില്‍ 15 മുതല്‍ 20 വരെ ആളുകളുണ്ടായിരുന്നതായാണ് പ്രാഥമിക വിവരം. വിരുന്നില്‍ പങ്കെടുക്കുന്നതിനായി യാത്ര ചെയ്യുകയായിരുന്നവരാണ് അപകടത്തില്‍പ്പെട്ടത്.
അപകടത്തില്‍ അഞ്ച് പേരെ രക്ഷപ്പെടുത്തിയതായി വൈശാലി ജില്ലാ മജിസ്ട്രേറ്റ് അറിയിച്ചു. ആദ്യം എട്ട് പേര്‍ വരെ മരിച്ചതായുള്ള റിപ്പോര്‍ട്ടുകളാണ് പുറത്തുവന്നത്. എന്നാല്‍ പിന്നീട് നടത്തിയ സ്ഥിരീകരണത്തിലാണ് 11 പേര്‍ക്ക് ജീവന്‍ നഷ്ടമായതായി വ്യക്തമായത്.
ബോട്ട് മറിഞ്ഞതിന്റെ കൃത്യമായ കാരണം സംബന്ധിച്ച വിവരങ്ങള്‍ ലഭ്യമായിട്ടില്ല. അപകടത്തില്‍പ്പെട്ടവരുടെ തിരിച്ചറിയല്‍ വിവരങ്ങളും കൂടുതല്‍ പേരെ കാണാതായിട്ടുണ്ടോ എന്നതും പരിശോധിച്ചു വരികയാണ്. നദിയിലൂടെയുള്ള ബോട്ട് യാത്രകളുടെ സുരക്ഷയെക്കുറിച്ചും സംഭവം ആശങ്ക ഉയര്‍ത്തിയിട്ടുണ്ട്. വിശദമായ അന്വേഷണത്തിന് ശേഷം രക്ഷാപ്രവര്‍ത്തനത്തിന്റെ കൂടുതല്‍ വിവരങ്ങള്‍ പുറത്തുവിടുമെന്ന് അധികൃതര്‍ അറിയിച്ചു.
