കെ ടി ജലീലിൻ്റെ ഓഫീസില്‍ കരി ഓയില്‍ ഒഴിച്ച ബിജെപി പ്രവര്‍ത്തകര്‍ അറസ്റ്റില്‍
മലപ്പുറം: കെ ടി ജലീല്‍ എംഎല്‍എയുടെ ഓഫീസില്‍ കരി ഓയില്‍ ഒഴിച്ച സംഭവത്തില്‍ മൂന്നു ബിജെപി പ്രവര്‍ത്തകരെ ചങ്ങരംകുളം പോലീസ് അറസ്റ്റ് ചെയ്തു. പുഴക്കാട്ടിരി സ്വദേശി ഏലായില്‍ സജേഷ് (31), മാങ്ങാട്ടിരി സ്വദേശി കദളിയില്‍ സുബിത്ത് (27), മൂതൂര്‍ സ്വദേശി കോതകുളങ്ങര സുധന്‍ (30) എന്നിവരെയാണ് അന്വേഷണസംഘം അറസ്റ്റ് ചെയ്തത്.
തിരൂര്‍ ഡിവൈഎസ്പി ബെന്നി ചങ്ങരംകുളം സിഐ ബഷീര്‍ ചിറക്കല്‍ എന്നിവരുടെ മേല്‍നോട്ടത്തില്‍ അന്വേഷണ ഉദ്ധ്യോഗസ്ഥരായ എസ്ഐ ബാബു ജോര്‍ജ്ജ്, എസ് ഖാലിദ്, സിപിഒ മാരായ സനോജ്, ഷിജു എന്നിവര്‍ ചേര്‍ന്നാണ് പ്രതികളെ പിടികൂടി അന്വേഷണം നടത്തുന്നത്. പിടിയിലായ പ്രതികളെ പൊന്നാനി ജുഡീഷ്യല്‍ മജിസ്‌ട്രേറ്റ് കോടതിയില്‍ ഹാജരാക്കി.
അതേസമയം രാജ്യദ്രോഹ പരാമര്‍ശം നടത്തിയ കെ ടി ജലീല്‍ എംഎല്‍എ സ്ഥാനം രാജിവെക്കണം എന്നാവശ്യപ്പെട്ട് ബിജെപി പ്രവര്‍ത്തകർ വളാഞ്ചേരിയിലുള്ള ജലീലിൻ്റെ വീട്ടിലേക്കും മാര്‍ച്ച് നടത്തി. കെ ടി ജലീലിനെ കാത്തിരിക്കുന്നത് കര്‍ണാടക പരപ്പന അഗ്രഹാര ജയിലില്‍ കഴിയുന്ന മദനിയുടെ അവസ്ഥയാണെന്ന് ചടങ്ങ് ഉദ്ഘാടനം ചെയ്ത് ബിജെപി ജില്ലാ പ്രസിഡൻ്റ് രവി തേലത്ത് പറഞ്ഞു. രാജ്യം ഒറ്റക്കെട്ടായി സ്വാതന്ത്ര്യത്തിൻ്റെ അമൃതോത്സവം ആഘോഷിക്കുന്ന വേളയില്‍ മുമ്പൊന്നുമില്ലാത്ത വിധം ഉയര്‍ന്ന ദേശീയ ഐക്യം തകര്‍ക്കാനുള്ള ബോധപൂര്‍വ്വമുള്ള ശ്രമത്തിൻ്റെ ഭാഗമാണ് ജലീലിന്റെ ആസാദ് കശ്മീര്‍ പരാമര്‍ശമെന്നും അദ്ദേഹം കുറ്റപ്പെടുത്തി.
