യുക്രൈനിൽ നിന്നെത്തിയ വിദ്യാർഥികൾക്ക് ആശ്വാസം, സർവകലാശാല മാറാൻ അനുമതി

ന്യൂ ഡൽഹി: യുക്രൈനിൽ നിന്നു മടങ്ങിയെത്തിയ വിദ്യാർഥികൾക്ക് മറ്റു രാജ്യങ്ങളിലെ സർവകലാശാലകളിൽ പഠനം പൂർത്തിയാക്കാൻ അനുമതി. ദേശീയ മെഡിക്കൽ കമ്മീഷൻ (എൻഎംസി) ആണ് യുക്രൈൻ സർവകലാശാലകളുടെ ബദൽ നിർദേശത്തിന് അനുമതി നൽകിയത്. യുക്രൈൻ സർവകലാശാലകളിലെ വിദ്യാർഥികളായി തുടർന്നാണ് മറ്റു സർവകലാശാലകളിൽ പഠിക്കാൻ സാധിക്കുക.

യുക്രൈൻ- റഷ്യ യുദ്ധത്തെ തുടർന്ന് 20,000 ത്തോളം മെഡിക്കൽ വിദ്യാർഥികളാണ് ഇന്ത്യയിലേക്ക് മടങ്ങിയെത്തിയത്. യുക്രൈനിലെ ഒരു സർവകലാശാലയിൽ വിദ്യാർഥിയായി തുടർന്നുകൊണ്ട് യൂറോപ്പിലെയോ, മറ്റേതെങ്കിലും രാജ്യങ്ങളിലെയോ സർവകലാശാലകളിൽ പഠിക്കാമെന്നായിരുന്നു യുക്രൈൻ അവതരിപ്പിച്ച അക്കാദമിക് മൊബിലിറ്റി പദ്ധതി. സർട്ടിഫിക്കറ്റ് നൽകുന്നത് യുക്രൈനിലെ സർവകലാശാല തന്നെയായിരിക്കും.

നേരത്തെ യുക്രൈൻ മുന്നോട്ടുവെച്ച അക്കാദമിക് മൊബിലിറ്റി പദ്ധതി ഇന്ത്യ അംഗീകരിച്ചിരുന്നില്ല. ഇന്ന് പുറത്തിറക്കിയ പുതിയ ഉത്തരവിലാണ് യുക്രൈൻ്റെ നിർദേശം ഇന്ത്യ അംഗീകരിച്ചിരിക്കുന്നത്. ഒരേ സർവകലാശാലയിൽ തന്നെ കോഴ്സ് പൂർത്തിയാക്കണമെന്ന നിബന്ധനയാണ് ഒഴിവാക്കിയത്. വിദേശകാര്യ മന്ത്രാലയവുമായി കൂടി ചർച്ച നടത്തിയാണ് വിദ്യാർഥികൾക്ക് ആശ്വാസമാകുന്ന നടപടിക്ക് എൻഎംസി അനുമതി നൽകിയത്. ഇതോടെ പുതിയ സെമസ്റ്ററിൽ വിദ്യാർഥികൾക്ക് നേരിട്ട് ക്ലാസിലെത്തി പഠനം തുടരാം. ഇന്ത്യയിലെ സ്വകാര്യ മെഡിക്കൽ കോളേജുകളിൽ സീറ്റ് നൽകണമെന്ന് യുക്രൈനിൽ നിന്നു മടങ്ങിയെത്തിയ വിദ്യാർഥികൾ ആവശ്യപ്പെട്ടിരുന്നു. എന്നാൽ ഇതിനോട് അനുകൂല പ്രതികരണം ഉണ്ടായിട്ടില്ല.