ഇന്ത്യൻ സോഷ്യല്‍ ക്ലബ് ഫുജൈറ ഇന്ത്യ ഫെസ്റ്റ് സംഘടിപ്പിച്ചു
ഫുജൈറ: ഇന്ത്യൻ സോഷ്യല്‍ ക്ലബ് ഫുജൈറ ഇന്ത്യ ഫെസ്റ്റ് സംഘടിപ്പിച്ചു. ഇന്ത്യന്‍ സോഷ്യല്‍ ക്ലബിന് മുന്‍വശത്തുള്ള ഫസീല്‍ പാര്‍ക്കില്‍ വെച്ചു നടന്ന പരിപാടിയില്‍ വിവിധ സംസ്ഥാനങ്ങളില്‍ നിന്നായി ആയിരങ്ങള്‍ പങ്കെടുത്തു.
വിവിധങ്ങളായ നൃത്ത പ്രകടനങ്ങളും ശിങ്കാരിമേളവും എല്ലാമായി വേദി ഒരു ഉത്സവലഹരിയിലായിരുന്നു.
ഇന്ത്യൻ സോഷ്യല്‍ ക്ലബ് പ്രസിഡന്‍റ് നാസറുദ്ദീൻ അധ്യക്ഷത വഹിച്ച പരിപാടി ഇന്ത്യൻ കൗണ്‍സില്‍ ജനറല്‍ സതീഷ് കുമാർ ശിവൻ ഉദ്ഘാടനം ചെയ്തു. അബ്ദുല്‍ ഗഫൂർ ബഹ്രൂസിയാൻ മുഖ്യാതിഥിയായി. ജനറല്‍ സെക്രട്ടറി പ്രദീപ് കുമാര്‍ സ്വാഗതം പറഞ്ഞു. വൈസ് പ്രസിഡന്‍റ് സഞ്ജീവ് മേനോൻ ആമുഖപ്രഭാഷണം നടത്തി.
ഇന്ത്യൻ സോഷ്യല്‍ ക്ലബ് അഡ്വൈസർ ഡോക്ടർ പുത്തൂർ റഹ്മാൻ, അന്‍വര്‍ നഹ, മലയാള സിനിമ നടി അന്‍ഷിബ ഹസന്‍ എന്നിവർ ആശംസകള്‍ അർപ്പിച്ചു സംസാരിച്ചു. ഇന്ത്യൻ സോഷ്യല്‍ ക്ലബ്ബിനും ഇന്ത്യൻ കമ്മ്യൂണിറ്റിക്കും നല്‍കിക്കൊണ്ടിരുന്ന ദീർഘകാലത്തെ സേവനങ്ങള്‍ പരിഗണിച്ച്‌ ഫുജൈറ ഗവണ്‍മെൻ്റിൻ്റെ സാമ്ബത്തിക വിഭാഗം ഡയറക്ടർ അലി തജല്ലി, ഫോട്ടോഗ്രാഫർ ജാവേധ് ഖുറൈശി എന്നിവരെ പരിപാടിയില്‍ ആദരിച്ചു.
ഇന്ത്യയിലെ വിവിധ സംസ്ഥാനങ്ങളില്‍ നിന്നുള്ള രുചിയേറും ഭക്ഷങ്ങളുടെ കൗണ്ടറുകളില്‍ എല്ലാം വന്‍ തിരക്കാണ് അനുഭവപ്പെട്ടത്. എക്സിക്യൂട്ടീവ് അംഗങ്ങളായ സുഭഗൻ, സിറാജ്, സന്തോഷ് മത്തായി, മുഹമ്മദലി, അനീഷ്, ജഗദീഷ്,, അബ്ദുല്‍ ജലീല്‍ അശോക്, ജോജി മണ്ഡപത്തില്‍, അബ്ദുള്ള, ഇസ്ഹാഖ് എന്നിവർ പരിപാടിക്ക് നേതൃത്വം നല്‍കി. സോഷ്യല്‍ ക്ലബ് കള്‍ച്ചറല്‍ സെക്രട്ടറി സുഭാഷ് നന്ദി പറഞ്ഞു.