മാല പൊട്ടിച്ചു കടന്നു കളയാൻ ശ്രമിച്ച പ്രതി പിടിയിൽ

കിളിമാനൂർ: മോട്ടോർ സൈക്കിളിൽ സഞ്ചരിച്ചിരുന്ന പെൺകുട്ടിയെ പിന്തുടർന്ന് കഴുത്തിൽ കിടന്ന മാല പൊട്ടിച്ചു കടന്നു കളയാൻ ശ്രമിച്ച പ്രതി പിടിയിൽ. പെരിങ്ങമ്മല ജവഹർ കോളനിയിൽ അൻസിൽ (20) ആണ് അറസ്റ്റിലായത്. കിളിമാനൂർ പോലീസ് സ്റ്റേഷൻ പരിധിയിൽ താളിക്കുഴിയിൽ വച്ചായിരുന്നു സംഭവം.

സ്കൂട്ടിയിൽ യാത്ര ചെയ്യുകയായിരുന്ന പെൺകുട്ടിയെ പിന്തുടർന്ന് ബൈക്കിലെത്തിയ മോഷ്ടാക്കൾ താളിക്കുഴിയിൽ വച്ച് മാല വലിച്ചു പൊട്ടിക്കാൻ ശ്രമിക്കുകയുമായിരുന്നു. പെൺകുട്ടി നിലവിളിച്ചതിനെ തുടർന്ന് രക്ഷപ്പെട്ട മോഷ്ടാക്കളുടെ ബൈക്കിന്റെ നമ്പർ കേന്ദ്രീകരിച്ച് പാങ്ങോട് പൊലിസിന്റെ സഹായത്തോടെ നടത്തിയ അന്വേഷണത്തിലാണ് കിളിമാനൂർ പൊലീസ് പ്രതിയെ അറസ്റ്റ് ചെയ്തത്.

മറ്റ് പ്രതികൾക്കായുള്ള അന്വേഷണം തുടരുന്നതായും, പ്രതിക്കെതിരേ നെടുമങ്ങാട് പൊലീസ് സ്റ്റേഷനിലും ഇത്തരത്തിൽ കേസുകൾ ഉള്ളതായി സി.ഐ.കെ.ബി മനോജ് കുമാർ അറിയിച്ചു