മലപ്പുറത്ത് 11 സ്‌കൂളുകള്‍ കൂടി അന്താരാഷ്ട്ര നിലവാരത്തിലേക്ക്
മലപ്പുറം ; പൊതുവിദ്യാഭ്യാസ സംരക്ഷണ യജ്ഞത്തിന്റെ ഭാഗമായി മലപ്പുറം ജില്ലയില്‍ 11 സ്‌കൂളുകള്‍ കൂടി അന്താരാഷ്ട്ര നിലവാരത്തിലേക്ക് ഉയരുന്നു. 5 കോടി രൂപ ചെലവില്‍ നിര്‍മ്മിച്ച ഗവ . മാനവേദന്‍ വൊക്കേഷണല്‍ ഹയര്‍ സെക്കന്ററി സ്‌കൂള്‍ നിലമ്പൂര്‍, 3 കോടി രൂപ ചെലവില്‍ നിര്‍മ്മിച്ച ജി എച്ച് എസ് എസ് പുലാമന്തോള്‍, ജി എച്ച് എസ് എസ് കുന്നക്കാവ് , പ്ലാന്‍ ഫണ്ടില്‍ നിന്നും നിര്‍മ്മാണം പൂര്‍ത്തിയാക്കിയ ജി എം എല്‍ പി എസ് മൊറയൂര്‍, (1.15 കോടി), ജി എല്‍ പി എസ് പറങ്കിമൂച്ചിക്കല്‍ , ജി എല്‍ പി എസ് താനൂര്‍, കെ എം ജി യു പി എസ് തവനൂര്‍ – 1 കോടി രൂപ വീതം, എന്നീ സ്‌കൂളുകളാണ് നിര്‍മ്മാണം പൂര്‍ത്തിയാക്കി ഫെബ്രുവരി 6 ന് ഉദ്ഘാടനം ചെയ്യുന്നത്. മുഖ്യമന്ത്രി പിണറായി വിജയന്‍ ഓണ്‍ലൈനായാണ് ഉദ്ഘാടനം നിര്‍വ്വഹിക്കുക. ചടങ്ങില്‍ പൊതുവിദ്യാഭ്യാസ വകുപ്പ് മന്ത്രി പി. രവീന്ദ്രനാഥ് അധ്യക്ഷത വഹിക്കും . ധനകാര്യ മന്ത്രി ഡോ.തോമസ് ഐസക്ക് മുഖ്യ പ്രഭാഷണം നടത്തും. ഉന്നത വിദ്യാഭ്യാസ വകുപ്പ് മന്ത്രി കെ ടി ജലീല്‍ മുഖ്യാതിഥിയായിരിക്കും. എം എല്‍ എ മാരായ പി വി അന്‍വര്‍, മഞ്ഞളാംകുഴി അലി, ആബിദ് ഹുസൈന്‍ തങ്ങള്‍, പി. ഉബൈദുള്ള, വി. അബ്ദുറഹിമാന്‍ എന്നിവര്‍ വിവിധ സ്‌കൂളുകളില്‍ സംബന്ധിക്കും. പൊതുവിദ്യാഭ്യാസ സെക്രട്ടറി എ ഷാജഹാന്‍ സ്വാഗതവും, പൊതുവിദ്യാഭ്യാസ ഡയറക്ടര്‍ കെ ജീവന്‍ ബാബു നന്ദിയും പറയും
ഇതിനോട് അനുബന്ധിച്ച് ഓരോ സ്‌കൂളുകളിലും ജനപ്രതിനിധികളുടെയും ജില്ലാ വിദ്യാഭ്യാസ ഓഫീസര്‍മാരുടെയും നേതൃത്വത്തില്‍ നേരിട്ട് ഉദ്ഘാടന പരിപാടികള്‍ നടക്കും. നേരത്തെ 5 കോടി രൂപ അനുവദിച്ച ഏഴ് സൂകളുകളും 3 കോടി രൂപ അനുവദിച്ച 10 സ്‌കൂളുകളും പ്ലാന്‍ ഫണ്ടില്‍ നിന്ന് ഫണ്ട് അനുവദിച്ച 15 സ്‌കൂളുകളും ഉദ്ഘാടനം ചെയ്തിരുന്നു. ഇതിനു പുറമേ ഫെബ്രുവരി 18 ന് 5 കോടി രൂപ ചെലവില്‍ നിര്‍മ്മിച്ച ഗവ.മോഡല്‍ എച്ച് എസ് എസ് പെരിന്തല്‍മണ്ണ, ജി എച്ച് എസ് എസ് കുഴിമണ്ണ, ജി എച്ച് എസ് എസ് തുവ്വൂര്‍, 3 കോടി രൂപ ചെലവില്‍ നിര്‍മ്മിച്ച ജി എച്ച് എസ് അഞ്ചച്ചവടി , ജി എച്ച് എസ് എസ് കരുവാരക്കുണ്ട് , ജി എച്ച് എസ് എസ് തിരുവാലി എന്നീ സ്‌കൂളുകള്‍ കൂടി ഉദ്ഘാടനം ചെയ്യുമെന്ന് പൊതുവിദ്യാഭ്യാസ സംരക്ഷണ യജ്ഞം ജില്ലാ കോ. ഓര്‍ഡിനേറ്റര്‍ എം മണി അറിയിച്ചു. ജില്ലയില്‍ 16 സ്‌കൂളുകള്‍ക്ക് 5 കോടിരൂപ വീതവും 86 സ്‌കൂളുകള്‍ക്ക് മൂന്നൂ കോടി രൂപ വീതവും 66 സ്‌കൂളുകള്‍ക്ക് 1 കോടി രൂപ വീതവും 87 സ്‌കൂളുകള്‍ക്ക് പ്ലാന്‍ ഫണ്ടും അനുവദിച്ച് ഇവയുടെ നിര്‍മ്മാണ പ്രവര്‍ത്തനവും വിവിധ ഘട്ടങ്ങളില്‍ നടന്നു.