ഫ്രഷ് കട്ട് തുറന്നാല്‍ കോഴിമാലിന്യവുമായി മന്ത്രിമാരുടെ വീട്ടിലേക്ക് യൂത്ത് ലീഗ് മാര്‍ച്ച് നടത്തും; പി കെ ഫിറോസ്
താമരശേരിയിലെ ഫ്രഷ്‌കട്ടിനെ സംരക്ഷിക്കാന്‍ സര്‍ക്കാരിന്റെയും പൊലീസിന്റെ ശ്രമമെന്ന് യൂത്ത് ലീഗ്. പൊലീസാണ് അക്രമം നടത്തിയതെന്നും യുഡിഎഫ് ഭരിക്കുന്ന പഞ്ചായത്തുകളില്‍ ഭീകരാന്തരീക്ഷം ഉണ്ടാക്കി പ്രവര്‍ത്തകരെ തെരഞ്ഞെടുപ്പ് രംഗത്തു നിന്ന് മാറ്റിനിര്‍ത്താനാണ് ശ്രമമെന്നും യൂത്ത് ലീഗ് സംസ്ഥാന ജനറല്‍ സെക്രട്ടറി പി.കെ ഫിറോസ് പറഞ്ഞു.
ഫ്രഷ് കട്ട് തുറന്നാല്‍ കോഴിമാലിന്യമുമായി കോഴിക്കോട്ടെ മന്ത്രിമാരുടെ വീട്ടിലേക്ക് മാര്‍ച്ച് നടത്തും. ജില്ലാ ശുചിത്വ മിഷനും തഹസില്‍ദാറും എല്ലാം തയ്യാറാക്കിയ റിപ്പോര്‍ട്ടുകളിലും ഈ സ്ഥാപനം നിയമാനുസൃതമായല്ല പ്രവര്‍ത്തിക്കുന്നതെന്നും പറയുന്നതായി ഫിറോസ് മാധ്യമങ്ങളോട് പറഞ്ഞു. എല്ലാ നിയമങ്ങളും പാലിച്ചും എല്ലാ ആക്ഷേപങ്ങളും പരിഹരിച്ചുമാണ് ഫ്രഷ് കട്ട് സ്ഥാപനം മുന്നോട്ടുപോകുന്നത് എന്നാണ് തദ്ദേശ സ്വയംഭരണ വകുപ്പ് മന്ത്രി എം.ബി രാജേഷ് പറഞ്ഞത്.
എന്നാല്‍ നാല് പഞ്ചായത്തുകളിലെ സെക്രട്ടറിമാര്‍ തയ്യാറാക്കിയ റിപ്പോര്‍ട്ടുകളില്‍ ഈ അറവുമാലിന്യ കേന്ദ്രത്തില്‍ നിന്നുള്ള രൂക്ഷമായ ഗന്ധം അവിടെയുള്ള ജനങ്ങള്‍ അനുഭവിക്കുന്നുണ്ടെന്നും സ്ഥാപനത്തോട് ചേര്‍ന്ന് നില്‍ക്കുന്ന ഇരുതുള്ളി പുഴയിലേക്ക് മാലിന്യങ്ങള്‍ ഒഴുക്കുന്നുണ്ടെന്നും ഫ്രീസര്‍ ഇല്ലാത്ത വാഹനങ്ങളില്‍ സ്ഥാപനത്തിലെ മാലിന്യങ്ങള്‍ കൊണ്ടുപോവുന്നുണ്ടെന്നും ഫിറോസ് പറഞ്ഞു.
സമരവുമായി ബന്ധപ്പെട്ട് നടത്തിയ അക്രമങ്ങളെ ഒരു നിലക്കും അംഗീകരിക്കാം കഴിയില്ല എന്നാണ് മന്ത്രി പറഞ്ഞത്. എന്നാല്‍ കണ്ണൂര്‍ ഡിഐജി യതീഷ് ചന്ദ്രയും വടകര എസ്പി ബെജുവും നേരിട്ടെത്തി ആക്രമണങ്ങള്‍ക്ക് നേത്രത്വം കൊടുക്കുകയാണ് എന്നുള്ളത് ദൃശ്യങ്ങളില്‍ നിന്ന് തന്നെ വ്യക്തമാണ്.’ ഫിറോസ് കൂട്ടിച്ചേര്‍ത്തു.