കാഫിര് സ്ക്രീന് ഷോട്ടില് എസ്ഐടി അന്വേഷണം; കോഴിക്കോട് റൂറല് എസ്പിയുടെ നേതൃത്വത്തില് അന്വേഷണം
കാഫിര് സ്ക്രീന് ഷോട്ടില് എസ്ഐടി അന്വേഷണം. കോഴിക്കോട് റൂറല് എസ്പിയുടെ നേതൃത്വത്തിലാണ് അന്വേഷണം. കണ്ണൂര് ഡിഐജിക്കാണ് ഏകോപന ചുമതല.
പാറക്കല് അബ്ദുള്ള എംഎല്എ വിഷയവുമായി ബന്ധപ്പെട്ട പുനരന്വേഷണത്തിന് നിവേദനം നല്കിയികിയിരുന്നു. നേരത്തെ, പ്രതികളിലേക്ക് എത്താന് കഴിഞ്ഞില്ലെന്ന് പറഞ്ഞ് പൊലീസ് കോടതിയില് റിപ്പോര്ട്ട് നല്കിയിരുന്നു. ഫൊറന്സിക് റിപ്പോര്ട്ടും പുറത്ത് വന്നില്ല. സ്ക്രീന്ഷോട്ട് സന്ദേശം ആര് സൃഷ്ടിച്ചുവെന്ന് ഇതുവരെ കണ്ടെത്താനായിട്ടില്ല.
ലോക്സഭാ തിരഞ്ഞെടുപ്പില് വലിയ കോളിളക്കം സൃഷ്ടിച്ച വിവാദത്തില് രണ്ട് വര്ഷത്തോളം അന്വേഷണം നീണ്ടിരുന്നു. സിപിഐഎമ്മാണ് സ്ക്രീന്ഷോട്ടിന് പിന്നിലെന്നാണ് യുഡിഎഫിന്റെ ആരോപണം. 2024-ലെ ലോക്സഭാ തിരഞ്ഞെടുപ്പിന്റെ ഒരു ദിവസം ബാക്കി നില്ക്കെ എല്ഡിഎഫ് സ്ഥാനാര്ഥിയായിരുന്ന കെ കെ ശൈലജയ്ക്കെതിരേ കാഫിര് സ്ക്രീന്ഷോട്ട് പ്രചരിപ്പിച്ചുവെന്നതാണ് വിവാദത്തിന് തുടക്കം. കേസില് ആദ്യം എംഎസ്എഫ് നേതാവ് മുഹമ്മദ് കാസിമിന്റെ പേരില് കേസെടുത്തിരുന്നു. എന്നാല് അദ്ദേഹത്തിന്റെ പങ്ക് തെളിയിക്കപ്പെട്ടില്ലെന്ന് ഹൈക്കോടതി കണ്ടെത്തി.
അമ്പാടിമുക്ക് സഖാക്കള് ഫേസ്ബുക്ക് ഗ്രൂപ്പിന്റെ അഡ്മിന് മനീഷ്, റെഡ് ബറ്റാലിയന് വാട്സ്ആപ്പ് ഗ്രൂപ്പില് പോസ്റ്റ് ചെയ്ത അമല് റാം, റെഡ് എന്കൗണ്ടര് ഗ്രൂപ്പില് പോസ്റ്റ് ചെയ്ത റിബേഷ്, പോരാളി ഷാജി തുടങ്ങിയ ഇടത് സൈബര് പോരാളികള് സന്ദേശം പ്രചരിപ്പിച്ചുവെന്നാണ് പൊലീസ് റിപ്പോര്ട്ടില് പറയുന്നത്.