ഹൂതി വിമതർക്കെതിരെ കടുത്ത മുന്നറിയിപ്പുമായി ട്രംപ്
വാഷിംഗ്ടൺ: സൗദി അറേബ്യയ്‌ക്കെതിരെ തുടർച്ചയായ ആക്രമണങ്ങൾ നടത്തുന്ന യെമനിലെ ഇറാൻ പിന്തുണയുള്ള ഹൂതി വിമതർക്കെതിരെ കടുത്ത മുന്നറിയിപ്പുമായി യുഎസ് പ്രസിഡന്‍റ് ഡോണൾഡ് ട്രംപ്. ട്രൂത്ത് സോഷ്യലിൽ പങ്കുവെച്ച കുറിപ്പിലാണ് ട്രംപ് ഹൂതികളുടെ നടപടികളെ രൂക്ഷമായി വിമർശിച്ചത്. ഹൂതികൾ വളരെ മോശമായാണ് പെരുമാറുന്നതെന്നും, അമേരിക്ക ശക്തമായി തിരിച്ചടിച്ച കാലഘട്ടം അവർ മറന്നുപോയെന്നും ട്രംപ് വ്യക്തമാക്കി.
അമേരിക്കൻ തെരഞ്ഞെടുപ്പിന് മുന്നോടിയായി എണ്ണവില വർദ്ധിപ്പിക്കാനുള്ള ലക്ഷ്യത്തോടെയാണ് ഹൂതികൾ സൗദി അറേബ്യയ്ക്ക് നേരെ ആക്രമണങ്ങൾ നടത്തുന്നതെന്നും അദ്ദേഹം ആരോപിച്ചു. റിയാദിലെ കിംഗ് ഖാലിദ് അന്താരാഷ്ട്ര വിമാനത്താവളത്തിന് നേരെ കഴിഞ്ഞ ശനിയാഴ്ചയുണ്ടായ മിസൈൽ ആക്രമണത്തിൽ 13 പേർ കൊല്ലപ്പെട്ടിരുന്നു. ഇതിന്‍റെ പശ്ചാത്തലത്തിലാണ് ട്രംപിന്റെ പ്രതികരണം.
സൗദി കിരീടാവകാശി മുഹമ്മദ് ബിൻ സൽമാനുമായി താൻ സംസാരിച്ചിട്ടുണ്ടെന്ന് വ്യക്തമാക്കിയെങ്കിലും, സൗദിക്കൊപ്പം ചേർന്ന് ഹൂതികൾക്കെതിരെ സൈനിക നടപടിയിൽ പങ്കെടുക്കുമോ എന്ന ചോദ്യത്തിന് ട്രംപ് നേരിട്ട് മറുപടി നൽകിയില്ല. അത്തരം കാര്യങ്ങൾ മുൻകൂട്ടി വെളിപ്പെടുത്താൻ കഴിയില്ലെന്നായിരുന്നു വൈറ്റ് ഹൗസിൽ നിന്ന് അലാസ്കയിലേക്കുള്ള യാത്രയ്ക്കിടെ അദ്ദേഹം മാധ്യമങ്ങളോട് പ്രതികരിച്ചത്. 2025 മാർച്ചിൽ അമേരിക്ക ഹൂതി കേന്ദ്രങ്ങൾക്ക് നേരെ വ്യോമാക്രമണങ്ങൾ നടത്തിയിരുന്നു.
അതേസമയം, യെമൻ തലസ്ഥാനമായ സനായിൽ സൗദി നേതൃത്വത്തിലുള്ള സഖ്യസേന വ്യോമാക്രമണം നടത്തിയിരുന്നു. സനായുടെ പ്രാന്തപ്രദേശത്തുള്ള യെമൻ പെട്രോളിയം കമ്പനിയുടെ ഇന്ധന ഡിപ്പോയ്ക്ക് നേരെയാണ് ആക്രമണമുണ്ടായത്. സൗദി അറേബ്യയ്ക്കും അന്താരാഷ്ട്ര ജലപാതകൾക്കും ഭീഷണിയാകുന്ന ഹൂതികളുടെ സൈനിക നീക്കം തടയുന്നതിന്‍റെ ഭാഗമായാണ് ഈ ലക്ഷ്യങ്ങൾ ആക്രമിച്ചതെന്ന് സഖ്യസേന വ്യക്തമാക്കി.
കഴിഞ്ഞ ആഴ്ചകളിലായി സൗദിയിലെ വിവിധ വിമാനത്താവളങ്ങൾക്ക് നേരെ ഹൂതികൾ നടത്തിയ മിസൈൽ-ഡ്രോൺ ആക്രമണങ്ങളിൽ നിരവധി പേർ കൊല്ലപ്പെട്ടിരുന്നു. റിയാദ് വിമാനത്താവളത്തിന് നേരെ കഴിഞ്ഞ ശനിയാഴ്ചയുണ്ടായ ബാലസ്റ്റിക് മിസൈൽ ആക്രമണത്തിൽ 13 പേർ കൊല്ലപ്പെടുകയും ചെയ്തിരുന്നു. ഇതിനുള്ള മറുപടിയായാണ് സൗദി സായുധ സേന യെമനിൽ തിരിച്ചടി ശക്തമാക്കിയിരിക്കുന്നത്. മിസൈലുകളും ഡ്രോണുകളും സൂക്ഷിക്കാനും വിതരണം ചെയ്യാനുമാണ് ഹൂതികൾ ഈ കേന്ദ്രങ്ങൾ ഉപയോഗിക്കുന്നതെന്ന് സഖ്യസേന കുറ്റപ്പെടുത്തി.