സിനിമ സീരിയൽ താരം തനിമ സഞ്ചരിച്ചിരുന്ന കാർ അപകടത്തിൽപ്പെട്ടു.

ശ്രീകൃഷ്ണപുരം: പഞ്ചായത്ത് കല്യാണമണ്ഡപത്തിൽ സമീപത്താണ് ചലച്ചിത്ര – സീരിയൽ താരം തനിമ ഉൾപ്പെടെയുള്ള സിനിമാപ്രവർത്തകർ സഞ്ചരിച്ചിരുന്ന കാറാണ് അപകടത്തിൽ പെട്ടത്. ചൊവ്വാഴ്ച അതിരാവിലെ ഷൂട്ടിംഗ് കഴിഞ്ഞ് മടങ്ങുന്നതിനിടെയാണ് അപകടം നടന്നത്. അപകടത്തിൽ കാറിൽ സഞ്ചരിച്ചിരുന്ന ഒരു സ്ത്രീയുടെ നില അതീവ ഗുരുതരമാണ്. മറ്റ് നാലുപേരുടെ പരിക്കുകൾ സാരമുള്ളതല്ല. നാല് സ്ത്രീകളും, ഒരു പുരുഷനുമാണ് കാറിൽ സഞ്ചരിച്ചിരുന്നത്.

ഷൂട്ടിംഗ് കഴിഞ്ഞ് മണ്ണാർക്കാട് ഭാഗത്ത് നിന്ന് തിരുവാഴിയോട് ഭാഗത്തേക്ക് പോവുകയായിരുന്ന കാർ നിയന്ത്രണംവിട്ട് പഞ്ചായത്ത് കല്യാണമണ്ഡപത്തിൽ ചുറ്റുമതിലിൽ ഇടിക്കുകയായിരുന്നു. ഇടിയുടെ ആഘാതത്തിൽ കാറിന്റെ മുൻവശം പൂർണമായും തകർന്നു. പരിക്കേറ്റവരെ മണ്ണാർക്കാട് വട്ടമ്പലത്തുള്ള സ്വകാര്യ ആശുപത്രിയിൽ പ്രവേശിപ്പിച്ചു. കരിമ്പുഴ ട്രോമാകെയർ വളണ്ടിയർമാർ എത്തിയാണ് അപകടത്തിൽപ്പെട്ടവരെ ആശുപത്രിയിൽ എത്തിച്ചത്. തിരുവനന്തപുരം, കൊല്ലം, കൊട്ടാരക്കര എന്നീ പ്രദേശങ്ങളിലുള്ളവരാണ് അപകടത്തിൽപ്പെട്ടത്.