വിമാനത്താവളത്തിൽ നിന്ന് യാത്രക്കാരനെ തട്ടിക്കൊണ്ടു പോയി; കവർച്ചാ സംഘത്തലവൻ അറസ്റ്റിൽ

മലപ്പുറം: കരിപ്പൂർ അന്താരാഷ്ട്ര വിമാനത്താവളത്തിൽ വിദേശത്തു നിന്നും എത്തിയ യാത്രക്കാരനെ തട്ടിക്കൊണ്ടുപോയ സംഭവത്തിൽ കവർച്ചാ സംഘത്തലവൻ അറസ്റ്റിൽ. മോങ്ങം സ്വദേശി പള്ളിയാളിയിൽ ആദിർ മുസ(22) ആണ് പിടിയിലായത്. കഴിഞ്ഞ വർഷം ഡിസംബർ അഞ്ചിന്
കോഴിക്കോട് താമരശ്ശേരി സ്വദേശിയായ യുവാവിനെ തട്ടികൊണ്ടു പോയി മർദ്ദിച്ച് സ്വർണ്ണവും സാധനങ്ങളും കവർച്ച ചെയ്തതാണ് കേസിന് ആസ്പദമായ സംഭവം. കരിപ്പൂർ ഇൻസ്പെക്ടർ ഷിബുവിൻ്റെ നേതൃത്വത്തിൽ ഇന്ന് പുലർച്ചെ മഞ്ചേരിയിലെ രഹസ്യ കേന്ദ്രത്തിൽ നിന്നും പ്രത്യേക അന്വോഷണ സംഘമാണ് പ്രതിയെ
പിടികൂടിയത്.

സംഭവവുമായി ബംന്ധപ്പെട്ട് മോങ്ങം സ്വദേശി നൂറുൽ ഇസ്ലാ (35)മിനെ രണ്ട് ആഴ്ച മുൻപ് പിടികൂടിയിരുന്നു.
യുവാവിനെ തട്ടികൊണ്ടുപോകാൻ ഉപയോഗിച്ച കാർ ഒളിപ്പിച്ച നിലയിൽ ഇയാളുടെ സുഹൃത്തിൻ്റെ വീട്ടിൽ നിന്നും കണ്ടെടുത്തു. പരാതിക്കാരനെ സംഭവ ദിവസം പുലർച്ചെ എയർപോർട്ടിൽ നിന്നും തട്ടികൊണ്ടു പോയി വള്ളുവമ്പ്രം ഭാഗത്ത് വിജനമായ സ്ഥലത്ത് എത്തിച്ച് മർദ്ദിച്ച ശേഷം ഇയാൾ കടത്തികൊണ്ടു വന്ന സ്വർണ്ണം കവർച്ച ചെയ്യുകയായിരുന്നു. തുടർന്ന് ഇയാളെ കാറിൽ കയറ്റി കൊണ്ടുപോയി ആളൊഴിഞ്ഞ സ്ഥലത്ത് ഉപേക്ഷിച്ച് കടന്നു കളയുകയായിരുന്നു.

പിടിയിലായ ആളെ ചോദ്യം ചെയ്തതിൽ നിന്ന് സംഘത്തിൽ ഉൾപ്പെട്ട മുഴുവൻ പ്രതികളെക്കുറിച്ചും സൂചന ലഭിച്ചിട്ടുണ്ട്. ഇവർക്കായുള്ള അന്വോഷണം ഊർജ്ജിതമാക്കി. കൂടുതൽ അന്വേഷണത്തിനും തെളിവെടുപ്പിനുമായി ഇയാളെ കസ്റ്റഡിയിൽ വാങ്ങും.മലപ്പുറം ജില്ലാ പോലീസ് മേധാവി സുജിത്ത് ദാസ് ഐ.പി.എസിന് ലഭിച്ച രഹസ്യ വിവരത്തിൻ്റെ അടിസ്ഥാനത്തിൽ കൊണ്ടോട്ടി ഡി.വൈ.എസ്.പി അഷറഫിൻ്റെ നിർദ്ദേശപ്രകാരം കരിപ്പൂർ ഇൻസ്പക്ടർ ഷിബുവിൻ്റെ നേതൃത്വത്തിൽ പ്രത്യേക അന്വേഷണ സംഘാംഗങ്ങളായ അബ്ദുൾ അസീസ്, സത്യനാഥൻ, ശശി കുണ്ടറക്കാട്, ഉണ്ണികൃഷ്ണൻ മാരാത്ത്, പി. സഞ്ജീവ്, രതീഷ്, സ്വപ്ന, വേണുഗോപാൽ എന്നിവരാണ് പ്രതിയെ പിടികൂടി അന്വേഷണം നടത്തുന്നത്.