ഷാര്‍ജ: യുഎഇയിലെ ഷാര്‍ജയില്‍ വന്‍ മയക്കുമരുന്ന് വേട്ട. മാര്‍ബിള്‍ കല്ലിനകത്ത് ഒളിപ്പിച്ച നിലയില്‍ കടത്തിയ 226 കിലോഗ്രാം ലഹരിമരുന്നാണ് ഷാര്‍ജ പൊലീസ് പിടികൂടിയത്.മൂന്നു പേര്‍ അറസ്റ്റിലായി.
ഹാഷിഷ്, സൈക്കോട്രോപിക് വസ്തുക്കള്‍, മറ്റ് ലഹരിമരുന്നുകള്‍ എന്നിവ ഷാര്‍ജയിലെ തുറമുഖം വഴി കടത്തിയ ശേഷം യുഎഇയിലെ തെരുവുകളില്‍ വില്‍പ്പന നടത്താനാണ് സംഘം പദ്ധതിയിട്ടത്. ലഹരിമരുന്ന് സംഘത്തെ കുറിച്ച്‌ രഹസ്യ വിവരം ലഭിച്ച ഷാര്‍ജ പൊലീസിലെ ലഹരിമരുന്ന് വിരുദ്ധ സംഘം കര്‍ശന നിരീക്ഷണം നടത്തുകയായിരുന്നു. ലഹരിമരുന്ന് ഒളിപ്പിക്കാനുള്ള പ്രതികളുടെ ശ്രമം മനസ്സിലാക്കിയ പൊലീസ് ഇവരെ അറസ്റ്റ് ചെയ്യുകയായിരുന്നു.
മൂന്നു പേര്‍ പിടിയിലായി. ‘ഓപ്പറേഷൻ ഡിസ്ട്രക്ടിവ് സ്റ്റോണ്‍’എന്ന് പേരിട്ട ദൗത്യത്തിന്‍റെ വീഡിയോ പൊലീസ് പുറത്തുവിട്ടിട്ടുണ്ട്. ഒരു ലോറിയില്‍ നിന്നാണ് വന്‍തോതില്‍ ലഹരിമരുന്ന് ഒളിപ്പിച്ച മാര്‍ബിള്‍ കണ്ടെത്തിയത്. സംഭവത്തില്‍ മൂന്നംഗ ക്രിമിനല്‍ സംഘം അറസ്റ്റിലായതായി ഷാർജ പൊലീസ് ഡെപ്യൂട്ടി കമാൻഡർ ഇൻ ചീഫ് മേജർ ജനറല്‍ അബ്ദുല്ല മുബാറക് ബിൻ അമർ പറഞ്ഞു. എന്നാണ് സംഭവം ഉണ്ടായതെന്ന് പൊലീസ് പുറത്തുവിട്ടിട്ടില്ല. പ്രതികള്‍ക്ക് ദേശീയ, അന്തർദേശീയ മയക്കുമരുന്ന് കടത്ത് ശൃംഖലകളുമായി ബന്ധമുണ്ടെന്ന് അന്വേഷണത്തില്‍ കണ്ടെത്തിയിട്ടുണ്ട്.
ഇത്തരം സംശയകരമായ പ്രവർത്തനങ്ങള്‍ ശ്രദ്ധയില്‍പെട്ടാല്‍ 8004654 എന്ന നമ്ബറിലോ dea@shjpolice.gov.ae. എന്ന മെയില്‍ വിലാസത്തിലോ അറിയിക്കണമെന്നും പൊലീസ് അഭ്യർഥിച്ചു.