റെയില്‍വേ ട്രാക്കുകള്‍ കേന്ദ്രീകരിച്ച് മയക്കുമരുന്ന് ഉപയോഗം; 9-ാം ക്ലാസുകാരന്‍ ഉള്‍പ്പെടെ 5 പേര്‍ പരപ്പനങ്ങാടിയിൽ അറസ്റ്റില്‍
മലപ്പുറം: റെയില്‍വേ ട്രാക്കുകള്‍ കേന്ദ്രീകരിച്ച് മയക്കുമരുന്നിന്റെ ഉപയോഗം വര്‍ദ്ധിക്കുന്നതായുള്ള രഹസ്യവിവരത്തിന്റെ അടിസ്ഥാനത്തില്‍ പരപ്പനങ്ങാടി പോലീസും താനൂര്‍ സബ്ഡിവിഷന്‍ ഡാന്‍സാഫ് ടീമും സംയുക്തമായി നടത്തിയ പരിശോധനയില്‍ പ്രായപൂര്‍ത്തിയാകാത്ത 9-ാം ക്ലാസ്സുകാരന്‍ ഉള്‍പ്പെടെ 5 പേര്‍ അറസ്റ്റിലായി. പരപ്പനങ്ങാടി ഓവര്‍ ബ്രിഡ്ജിന് താഴെ റെയില്‍വേ ട്രാക്കില്‍ നിന്നും വള്ളിക്കുന്ന് റെയില്‍വേ സ്റ്റേഷനു സമീപം റെയില്‍വേ ട്രാക്കില്‍ നിന്നും അയപ്പന്‍ കാവ് റെയില്‍വെ പുറമ്പോക്കില്‍ നിന്നുമാണ് പ്രതികളെ പോലീസ് അറസ്റ്റ് ചെയ്തത്. മുഹമ്മദ് അര്‍ഷിദ്, (19 പൗരജിന്റെ പുരക്കല്‍, പുത്തന്‍ കടപ്പുറം, പരപ്പനങ്ങാടി , ഉമറുള്‍ മുക്താര്‍, (21) ഹമീദ്, പത്ത കുഞ്ഞാലിന്റെ പുരക്കല്‍, പുത്തന്‍ കടപ്പുറം, പരപ്പനങ്ങാടി, സല്‍മാനുള്‍ ഫാരിസ് (18) സഹദ്, പാണ്ടി വീട്, ആനങ്ങാടി , വള്ളിക്കുന്ന്, മുഷ്താഖ് അഹമ്മദ് (18) അസീസ്, കിഴക്കന്റെ പുരക്കല്‍ ,ആനങ്ങാടി , വള്ളിക്കുന്ന് എന്നിവരെയാണ് പരപ്പനങ്ങാടി പോലീസ് അറസ്റ്റ് ചെയ്തത്.
പ്രായപൂര്‍ത്തിയാകാത്ത 9-ാം ക്ലാസുകാരന്‍ വീട്ടില്‍ നിന്നും സ്‌കൂളില്‍ പോകുന്നു എന്നു പറഞ്ഞിറങ്ങിയിട്ട് കഞ്ചാവ് വലിക്കുവാനായി റെയില്‍വേ ട്രാക്കില്‍ എത്തുകയായിരുന്നു. പിടിയിലായവരുടെ പേരില്‍ മയക്കുമരുന്ന് ഉപയോഗിച്ചതിന് എന്‍ ഡി പിഎസ് ആക്ട് പ്രകാരം കേസ് രജിസ്റ്റര്‍ ചെയ്തു. പ്രായപൂര്‍ത്തിയാകാത്ത ആളുടെ പേരില്‍ ജുവനൈല്‍ കോടതിക്ക് റിപ്പോര്‍ട്ട് കൈമാറി. നിലവില്‍ എന്‍ഡിപി എസ് നിയമപ്രകാരം മയക്കുമരുന്ന് ഉപയോഗിച്ചാല്‍ 6 മാസം തടവ് ശിക്ഷ ലഭിക്കും.
പ്രായപൂര്‍ത്തി ആകാത്തയാള്‍ക്ക് മയക്കുമരുന്ന് കൊടുത്തയാളുടെ പേരില്‍ ജുവനൈല്‍ ജസ്റ്റിസ് ആക്ട് പ്രകാരവും കേസ് എടുത്തിട്ടുണ്ട്. മേല്‍ നിയമപ്രകാരം പ്രതിക്ക് 7 വര്‍ഷം തടവുശിക്ഷ ലഭിക്കും. പരപ്പനങ്ങാടി സിഐ ഹണി കെ ദാസ്, എസ്ഐ പ്രദീപ് കുമാര്‍, പരമേശ്വരന്‍ പോലീസുകാരായ രാമചന്ദ്രന്‍, രഞ്ചിത്ത്, ദിലീപ്, ഡാന്‍സാഫ് ടീമംഗങ്ങളായ ആല്‍ബിന്‍, സബ റുദീന്‍, ജിനേഷ് , വിപിന്‍ , അഭിമന്യു എന്നിവരുടെ നേതൃത്വത്തിലാണ് പരിശോധന നടന്നത്. ഇനിയും റെസിഡന്‍സ് അസോസിയേഷനുകളും ക്ലബുകളും മറ്റുമായി ചേര്‍ന്നുകൊണ്ട് പരിശോധന തുടരുമെന്ന് പരപ്പനങ്ങാടി പോലീസ് അറിയിച്ചു.