ഒ.ബി.സി, മതന്യൂനപക്ഷ വിഭാഗങ്ങള്ക്ക് സ്വയംതൊഴില് വായ്പ
സംസ്ഥാന പിന്നോക്ക വിഭാഗ വികസന കോര്പ്പറേഷന് മലപ്പുറം ജില്ലയിലെ സാമ്പത്തികമായി പിന്നോക്കം നില്ക്കുന്ന മറ്റു പിന്നോക്ക (ഒ.ബി.സി.), മതന്യൂനപക്ഷ വിഭാഗങ്ങളില്പ്പെട്ടവര്ക്കായി സ്വയംതൊഴില് വായ്പാ പദ്ധതി നടപ്പിലാക്കുന്നു. പുതിയ സ്വയംതൊഴില് സംരംഭങ്ങള് ആരംഭിക്കുന്നതിനും നിലവിലുള്ളവ വിപുലീകരിക്കുന്നതിനും 5.5 ശതമാനം മുതല് 8 ശതമാനം വരെ കുറഞ്ഞ പലിശ നിരക്കില് വായ്പ ലഭിക്കും.
പ്രവാസികള്, പ്രൊഫഷണല് കോഴ്സ് പാസായവര്, വിധവകള്, നിയമപരമായി വിവാഹമോചനം നേടിയ സ്ത്രീകള് എന്നിവര്ക്കും ടാക്സിയായി ഓടിക്കുന്നതിന് ഇലക്ട്രിക് / സി.എന്.ജി. വാഹനങ്ങള് വാങ്ങുന്നവര്ക്കും നിബന്ധനകള്ക്ക് വിധേയമായി സബ്സിഡി ആനുകൂല്യവും ലഭിക്കും. വായ്പാ തുക 60 തുല്യ ഗഡുക്കളായി തിരിച്ചടക്കണം. ആവശ്യമായ വസ്തു ജാമ്യമോ ഉദ്യോഗസ്ഥ ജാമ്യമോ ഹാജരാക്കണം. പൂരിപ്പിച്ച അപേക്ഷകള് ഒക്ടോബര് 20-നകം കോര്പ്പറേഷന്റെ ഓഫീസുകളില് ലഭ്യമാക്കണം. അപേക്ഷാഫോമും കൂടുതല് വിവരങ്ങളും കോര്പ്പറേഷന് ഓഫീസുകളില് നിന്നും ksbcdc.com വെബ്സൈറ്റിലെ ‘ജാലകം’ പോര്ട്ടല് വഴിയും ലഭിക്കും. അപേക്ഷകന്റെ പേരും ആരംഭിക്കാന് ഉദ്ദേശിക്കുന്ന പദ്ധതിയുടെ വിവരങ്ങളും 7306022527 എന്ന നമ്പറിലേക്ക് വാട്സ്ആപ്പ് അയച്ചാലും വിവരങ്ങള് ലഭിക്കും.
പെരിന്തല്മണ്ണ, ഏറനാട്, തിരൂരങ്ങാടി, കൊണ്ടോട്ടി താലൂക്കുകളിലുള്ളവര്ക്ക് മലപ്പുറം ജില്ലാ ഓഫീസുമായും (0483 2734114), തിരൂര്, പൊന്നാനി താലൂക്കുകളിലുള്ളവര്ക്ക് തിരൂര് ഉപജില്ലാ ഓഫീസുമായും (0494 2432275), നിലമ്പൂര് താലൂക്കിലുള്ളവര്ക്ക് വണ്ടൂര് ഉപജില്ലാ ഓഫീസുമായും (04931 248300) വിവരങ്ങള്ക്കായി ബന്ധപ്പെടാവുന്നതാണ്.
