നിർത്തിയിട്ട ലോറി കത്തി നശിച്ചു

മലപ്പുറം: മഞ്ചേരി മേലാക്കത്ത് നിർത്തിയിട്ട ലോറി കത്തി നശിച്ചു. ലോറിയിലുണ്ടായിരുന്ന പഴവർഗങ്ങൾഎത്തിക്കാൻ ഉപയോഗിക്കുന്ന ആയിരത്തോളം പ്ലാസ്റ്റിക് പെട്ടികളും കത്തി നശിച്ചു.
മേലാക്കം മദ്രസയുടെ കെട്ടിടത്തിൽ പ്രവർത്തിക്കുന്ന പഴവർഗങ്ങളുടെ മൊത്ത വ്യാപാര സ്ഥാപനത്തിൻറെ ഗോഡൗണിന് സമീപത്താണ് ലോറി നിർത്തിയിട്ടിരുന്നത്. പെട്ടികൾ ലോറിയിൽ കെട്ടിവെച്ച് മഹാരാഷ്ട്രയിലേക്ക് പഴവർഗങ്ങളുടെ ലോഡ് എടുക്കാൻ പുറപ്പെടാനിരിക്കുകയായിരുന്നു തീപിടിച്ചത്.

ഡ്രൈവർ തുറക്കൽ സ്വദേശി മുഹമ്മദ് ഹസ്സൻ ലോറിയെടുക്കാൻ വന്നപ്പോഴാണ് ലോറിയില്‍ തീപടരുന്നത് ശ്രദ്ധയില്‍പ്പെട്ടത്. തുടർന്ന് ഉടൻ തന്നെ ഡ്രൈവർ ഓടിയെത്തിയെങ്കിലും ഭീതി പരത്തുന്ന രീതിയിൽ വാഹനം മുഴുവൻ തീ പടർന്നു പിടിക്കുകയായിരുന്നു. തുടർന്ന് സമീപത്തെ പുൽക്കാടുകളിലേക്കും തീപടർന്നു. കെട്ടിടത്തിന് മുന്നിൽ നിർത്തിയിട്ടിരുന്ന വെള്ളം കൊണ്ടുപോകുന്ന ലോറിയിൽ നിന്നും വെള്ളം എത്തിച്ചാണ് പിന്നീട് തീയണച്ചത്.

ഇത് രക്ഷാപ്രവർത്തനത്തിനും ഡീസൽ ടാങ്കിലേക്ക്‌ തീപടരാതിരിക്കാനും സഹായകരമായി.
അഗ്നിബാധയുടെ കാരണം വ്യക്തമല്ല. കൊണ്ടോട്ടിയിൽ കെട്ടിടത്തിന് തീപിടിച്ചതോടെ മഞ്ചേരി അഗ്നിരക്ഷ സേന അങ്ങോട്ട് പുറപ്പെട്ടിരുന്നു. തുടർന്ന് തിരുവാലി യൂനിറ്റ് എത്തിയാണ് തീ പൂർണമായും അണച്ചത്. മലപ്പുറം സ്വദേശി വി പി നിസാറലി ആണ് ആർസി ഉടമ. നാട്ടുകാരും ട്രോമ കെയർ പ്രവർത്തകരും രക്ഷാപ്രവർത്തനത്തിന് പങ്കെടുത്തു.