ആളുകള്‍ക്ക് കൂടുതലിഷ്ടം കാര്‍ത്തിയെ, എനിക്ക് അസൂയ തോന്നുന്നു -സൂര്യ
തെന്നിന്ത്യൻ പ്രേക്ഷകര്‍ക്ക് പ്രത്യേകിച്ച്‌ മുഖവുരയൊന്നും ആവശ്യമില്ലാത്ത താരസഹോദരന്മാരാണ് സൂര്യയും കാര്‍ത്തിയും.
ഇരുവരും അവരവരുടേതായ ചിത്രങ്ങളുമായി തിരക്കിലാണ്. ഈയിടെ കാര്‍ത്തിയുടെ 25-ാം ചിത്രം പുറത്തിറങ്ങുന്നതിന്റെ ഭാഗമായി സംഘടിപ്പിച്ച ആഘോഷ പരിപാടിയില്‍ സൂര്യയും അതിഥിയായെത്തിയിരുന്നു. ഈ ചടങ്ങില്‍ കാര്‍ത്തിയേക്കുറിച്ച്‌ സൂര്യ പറഞ്ഞ ഒരു കാര്യം ആരാധകര്‍ കയ്യടികളോടെ സ്വീകരിച്ചിരിക്കുകയാണ്.
രാജു മുരുകൻ സംവിധാനം ചെയ്യുന്ന ജപ്പാൻ ആണ് കാര്‍ത്തിയുടെ 25-ാം ചിത്രമായി തിയേറ്ററുകളിലെത്തുന്നത്. ഇതിനുമുന്നോടിയായി കാര്‍ത്തി 25 എന്നുപേരിട്ട ആഘോഷം ചെന്നൈയില്‍ നടന്നിരുന്നു. ഈ പരിപാടിയില്‍ തമിഴ് ചലച്ചിത്രലോകത്തുനിന്നും നിരവധി പ്രമുഖര്‍ പങ്കെടുത്തിരുന്നു. എങ്കിലും സൂര്യയായിരുന്നു പ്രധാന ആകര്‍ഷണം. തനിക്ക് കാര്‍ത്തിയോട് ആസൂയയാണെന്നാണ് വേദിയില്‍ സംസാരിക്കവേ സൂര്യ തമാശയായി പറഞ്ഞത്. തന്നേക്കാളും പ്രേക്ഷകര്‍ക്ക് ഇഷ്ടം കാര്‍ത്തിയോടാണെന്നതാണ് അതിന് കാരണമെന്നും സൂര്യ പറഞ്ഞു.
“എന്നേക്കാളും ആളുകള്‍ക്കിഷ്ടം കാര്‍ത്തിയോടാണെന്ന് കേള്‍ക്കുമ്ബോള്‍ എനിക്ക് അസൂയ തോന്നാറുണ്ട്.ക്ഷേത്രങ്ങളിലും വിമാനത്താവളങ്ങളിലും എല്ലായിടത്തും ആളുകള്‍ എന്റെ അടുക്കല്‍ വരുന്നു. അവര്‍ എന്നെക്കാള്‍ അവനെ എങ്ങനെ ഇഷ്ടപ്പെടുന്നുവെന്ന് എന്നോട് പറയുന്നു. കാര്‍ത്തിക്ക് വേണമെങ്കില്‍ ഇപ്പോള്‍ 50 സിനിമകള്‍ ചെയ്യാനാവുമായിരുന്നു. എന്നാല്‍ ചെയ്ത ഓരോ ചിത്രത്തിനും ആവശ്യമായ സമയവും പരിശ്രമവും അദ്ദേഹം നല്‍കി. അതുകൊണ്ടാണ് നമ്മള്‍ ഇപ്പോള്‍ കാര്‍ത്തിയുടെ 25-ാം ചിത്രം ആഘോഷിക്കുന്നത്. ‘പരുത്തിവീരൻ’, ‘നാൻ മഹാൻ അല്ല’ പോലെ രണ്ട് തലത്തില്‍ നില്‍ക്കുന്ന ചിത്രങ്ങളെ അദ്ദേഹം എങ്ങനെ ചെയ്തു എന്ന് ഞാൻ ഇപ്പോഴും ആലോചിച്ച്‌ വിസ്മയിക്കുന്നുണ്ട്. ഞങ്ങളുടെ യാത്രകള്‍ തികച്ചും വ്യത്യസ്തമാണെന്ന് സ്ഥിരീകരിക്കപ്പെട്ടിരിക്കുന്നു.”സൂര്യ പറഞ്ഞു.
രാജു മുരുകൻ രചനയും സംവിധാനവും നിര്‍വഹിക്കുന്ന ഈ സിനിമയില്‍ നായികയാവുന്നത് അനു ഇമ്മാനുവലാണ്. ഡ്രീം വാരിയര്‍ പിക്ചര്‍സിൻ്റെ ബാനറില്‍ എസ്.ആര്‍.പ്രകാശ് ബാബു, എസ്.ആര്‍.പ്രഭു എന്നിവര്‍ നിര്‍മ്മിക്കുന്ന ആറാമത്തെ കാര്‍ത്തി ചിത്രമാണ് ‘ ജപ്പാൻ ‘. തെലുങ്ക് നടൻ സുനില്‍ ഈ സിനിമയില്‍ മുഖ്യ കഥാപാത്രത്തെ അവതരിപ്പിക്കുന്നു. ഗോലി സോഡ, കടുക് എന്നീ സിനിമകള്‍ സംവിധാനം ചെയ്ത് ശ്രദ്ധേയനായ ഛായാഗ്രാഹകൻ വിജയ് മില്‍ട്ടനും മറ്റൊരു പ്രധാന കഥാപാത്രത്തെ അവതരിപ്പിക്കുന്നുണ്ട്.
രവി വര്‍മ്മനാണ് ഛായഗ്രാഹകൻ. ജി. വി. പ്രകാശ് കുമാറാണ് സംഗീത സംവിധായകൻ. അനല്‍ അരസ് ഒരുക്കുന്ന ആക്ഷൻ രംഗങ്ങള്‍ ചിത്രത്തിൻ്റെ ഹൈ ലൈറ്റ് ആണ്. വ്യത്യസ്തമായ രൂപഭാവത്തിലുള്ള നായക കഥാപാത്രത്തെയാണ് കാര്‍ത്തി അവതരിപ്പിക്കുന്നത്. തമിഴ്നാട്, കേരളം ഉള്‍പ്പെടെ വിവിധ സംസ്ഥാനങ്ങളിലായിട്ടാണ് ‘ ജപ്പാൻ ‘ ചിത്രീകരിച്ചിരിക്കുന്നത്. ഈ മാസം പത്തിന് ചിത്രം തിയേറ്ററുകളിലെത്തും.